პოლიტიკა

ზუსტად ვიცით, რომ ინაუგურაციაზე ჩამობრძანდება სომხეთის პრეზიდენტი, ასევე ლიტვის სეიმის თავმჯდომარე - ლაშა ჟვანია

საქართველოს არჩეული პრეზიდენტი სალომე ზურაბიშვილი ინაუგურაციის დღეს, 16 დეკემბერს, თბილისში, მთაწმინდის მწერალთა და საზოგადო მოღვაწეთა პანთეონში ილია ჭავჭავაძის საფლავს გვირგვინით შეამკობს, ასევე დაგეგმილია გმირთა მემორიალზე მისვლაც. ამის შესახებ ინაუგურაციის მოსამზადებელი კომისიის წევრმა, ლაშა ჟვანიამ განაცხადა.

რაც შეეხება სტუმრებს, ჟვანიამ განაცხადა, რომ ინაუგურაციას დაესწრება სომხეთის პრეზიდენტი, ასევე ლიტვის სეიმის თავმჯდომარე.

„თბილისში, როგორც ცნობილია, არჩეული პრეზიდენტი მიბრძანდება წმინდა ილია მართლის საფლავზე. ასევე პატივს მიაგებს პანთეონში განსვენებულ საზოგადო მოღვაწეებს, ჩვენი ქვეყნის ისტორიისთვის მნიშვნელოვანი პიროვნებების საფლავებსა და გმირთა მემორიალს გვირგვინით შეამკობს.

ზუსტად ვიცით, რომ ჩამობრძანდება სომხეთის პრეზიდენტი. საუბარი მქონდა ლიტვის საელჩოსთან და ლიტვის სეიმის თავმჯდომარე ჩამოვა, ასევე სხვადასხვა ქვეყნის პარლამენტის თავმჯდომარეები იქნებიან“, – აღნიშნა ჟვანიამ.

საქართველოს არჩეული პრეზიდენტის, სალომე ზურაბიშვილის ინაუგურაცია 16 დეკემბერს თელავში გაიმართება.