კომენტარი
ეკა ბესელიას კვლავ უნდობლობას ვუცხადებ, მან პოლიტიკურ ჭრილში გადაიტანა ჩემი შვილის საქმე - ზაზა სარალიძე
ხორავას ქუჩაზე მოკლული დავით სარალიძის მამამ, ზაზა სარალიძემ ხორავას ქუჩის საქმის შემსწავლელი დროებითი საპარლამენტო საგამოძიებო კომისიის წევრ ეკა ბესელიას კვლავ უნდობლობა გამოუცხადა. ამის შესახებ სარალიძემ კომისიის სხდომის დაწყებამდე თქვა.
სარალიძემ განმარტა, რომ ბესელიამ საქმე პოლიტიკურ ჭრილში გადაიტანა.
„დღეს ვისაუბრებთ ყველაფერზე, რა ინფორმაციასაც ვფლობ. გამოძიებამ არაფერი არ გააკეთა. არ დაიჭირა მკვლელები. ფაქტობრივად, არაფერია ისეთი, რაც აქამდე არ თქმულა, ყველაფერი არის უკვე გაჟღერებული. კომისიისგან დადებითი მოლოდინი მაქვს, წინააღმდეგ შემთხვევაში არც ვითანამშრომლებდი მასთან.
რაც შეეხება ეკა ბესელიას, მე მას კვლავ უნდობლობას ვუცხადებ, თუმცა კარგია, რომ პირისპირ შეხვედრის საშუალება მომეცა. როგორც იქნა ვეტყვი, რატომ ვარ განაწყენებული მასზე. პოლიტიკურ ჭრილში გადაიტანა ჩემი შვილის საქმე თავისი განცხადებებით", - განაცხადა ზაზა სარალიძემ.
ამ წუთებში საგამოძიებო კომისიის წევრები ზაზა სარალიძესა და კიდევ ერთი მოკლული არასრულწლოვნის მამას, დავით დადუნაშვილს უსმენენ.