სამართალი

ადვოკატები სამოქალაქო სექტორს მოუწოდებენ ე.წ. კაბალების საქმეზე მოამზადონ დასკვნა

ე.წ. კაბელების საქმის განაჩენის დეტალები მსჯავრდებულთა ადვოკატებმა არასამთავრობო ორგანიზაციებს გააცნეს.

როგორც ადვოკატმა, სოსო ბარათაშვილმა განაცხადა, ე.წ. კაბელების საქმეზე მსჯავრდებულთა ინტერესების დამცველები სამოქალაქო სექტორს მოუწოდებენ მოამზადონ დასკვნა ამ საქმეზე.

,,ვინაიდან სასამართლო ნაკლები ნდობით სარგებლობს დღევანდელ დღეს, არსებობს გზა რომელსაც მივმართავთ ჩვენ. ეს არის ობიექტური დამკვირვებლები, ობიექტური მესამე პირები, ისეთი როგორიც არის სახალხო დამცველი, არასამთავრობო ორგანიზაციები და საერთაშორისო ორგანიზაციები. ვთხოვთ, შეისწავლონ ეს საქმე გააკეთონ თავიანთი დასკვნა და გააცნონ საზოგადოებას. სამართლებრივი გარემოებით მიგვაჩნია, რომ აბსოლუტურად არასწორად აქვს სასამართლოს შეფასებული და არ არის რთული საქმე, რომ სწორად შეფასდეს ის სამართლებრივი გარემოებები, რომელიც ამ საქმეში ფიგურირებს“, - განაცხადა ადვოკატმა სოსო ბარათაშვილმა.

თავის მხრივ, როგორც არასამთავრობო ორგანიზაცია საერთაშორისო გამჭვირვალობა - საქართველოს პროგრამის მენეჯერმა, გიორგი გვილავამ განაცხადა, ბრალი საკმაოდ სუსტად არის დასაბუთებული.

,,გაუგებარია რატომ არ დაინტერესდა გამოძიება უმაღლესი თანამდებობის პირებით. გარდა ამისა არ ჩანს ანგარების მოტივი, არ ჩანს, რომ მათ თანხა მიითვისეს. გარდა ამისა თანხის გადარიცხვის პროცესში ჩართული იყო ფინანსთა სამინისტრო, ამ საქმემ გაიარა მთავრობაც. ბუნებრივია ამდენ ინსტანციაში და ამდენ განხილვის შემდეგ გაუგებარია როგორ მოახერხეს ბრალდებულებმა ყველას და ყველაფრის მოტყუება. აქედან გამომდინარე ჩვენ ვამბობთ, რომ ბრალი საკმაოდ სუსტად არის დასაბუთებული და ყველა ის კითხვა, რომელიც წარმოიშვა, ზუსტად დაუსაბუთებლობის ბრალია, “ - აღნიშნა გვილავამ.

ნინო ექვთიმიშვილი