პოლიტიკა
არა ოკუპაციას! - „ევროპული საქართველოს“ ახალგაზრდულმა ფრთამ პარლამენტთან მცოცავი ოკუპაცია გააპროტესტა
დღეს თბილისის პარალმენტთან „ევროპული საქართველოს“ ახალგაზრდულმა ფრთამ აქცია „არა ოკუპაციას“ გამართა. შეკრების მონაწილეებმა მცოცავი ოკუპაცია გააპროტესტეს.
შეკრებილებმა სიმბოლურად მავთუხლართები აღმართეს და საზოგადოებას გააქტიურებისკენ მოუწოდეს.
აქციას ესწრებოდა „ევროპული საქართველოს“ მერობის კანდიდატი ელენე ხოშტარია. მისი თქმით, ხელისუფლება ჩუმი რეაგირების რეჟიმში იმყოფება.
„რუსეთი აგრძელებს ჩვენი სახელმწიფოებრიობის შელახვას. აქ ხდება ადამიანური ტრაგედია. საოკუპაციო ხაზის გადმოწევის გარდა, ეწირებიან ადამიანები, მათი სახლები და მიწები. ეს არა მხოლოდ ჩვენი, არამედ მთლიანად ცივილიზებული სამყაროს პრობლემაა. მაგრამ ჩვენს ნაცვლად არავინ მიხედავს ჩვენს უსაფრთხოებას, თუ საზოგადოება და ჩვენი მთავრობა აქტიურად და მკაფიოდ არ იზრუნებენ იმაზე, რომ საერთაშორისო თანამეგობრობა ჩავრთოთ. ჩვენი ხელისუფლება ჩუმი რეაგირების რეჟიმშია“, - განაცხადა ხოშტარიამ.
შეგახსენებთ, 4 ივლისს გორის რაიონ სოფელ ბერშუეთთან საოკუპაციო ძალებმა საზღვრის აღმნიშვნელი ბანერი დაამონტაჟეს, რის გამოც 10 ჰექტარი მიწა ოკუპაციის ხაზს მიღმა აღმოჩნდა.