მსოფლიო

აშშ-ის არჩევნებში ჩარევისთვის უცხო ქვეყნებსა და მოქალაქეებს სანქციებს დაუწესებენ - ტრამპის ახალი განკარგულება

აშშ-ის პრეზიდენტმა დონალდ ტრამპმა ხელი მოაწერა განკარგულებას, რომელიც ითვალისწინებს სანქციების დაწესებას იმ უცხო ქვეყნებისა თუ მოქალაქეების წინააღმდეგ, ვინც შეეცდებიან ამერიკულ არჩევნებში ჩარევას.

საქნციები ითვალისწინებს აქტივების გაყინვას, აშშ-ის ფინანსურ სისტემაზე ხელმისაწვდომობის შეზღუდვას, ასევე ამერიკის მოქალაქეებს აეკრძალებათ იმ კომპანიებში ინვესტირება, ვინც სასანქციო სიაში მოხვდება.

განკარგულების მიხედვით, სანქციების შემოღებაზე გადაწყვეტილებას მიიღებენ სახელმწიფო დეპარტამენტი და აშშ-ის ფინანსთა სამინისტრო.

ცნობისთვის, აგვისტოში ამერიკელ სენატორთა ჯგუფმა ( რომელშიც ასევე შედიოდა ჯონ მაკკეინიც) მოამზადა კანონპროექტი „კრემლის აგრესიისგან დაცვის შესახებ“. სენატორების მტკიცებით, ამ კანონპროექტის აქტუალობა განპირობებულია რუსეთის მცდელობებით, ჩაერიოს არჩევნებში.

აშშ რუსეთს 2016 წლის საპრეზიდენტო არჩევნებში ჩარევაში ადანაშაულებს, რასაც მოსკოვი კატეგორიულად უარყოფს.