პოლიტიკა

ჩვენ მანდატებთან დაკავშირებით გადაწყვეტილებას მივიღებთ მაშინ და იმ ფორმით, როცა ამას გადავწყვეტთ - ბექა ლილუაშვილი

ჩვენ მანდატებთან დაკავშირებით გადაწყვეტილებას მივიღებთ მაშინ და იმ ფორმით, როცა ამას გადავწყვეტთ, - ამის შესახებ „გახარია საქართველოსთვის“ ერთ-ერთმა ლიდერმა, ბექა ლილუაშვილმა ჟურნალისტებთან განაცხადა.

„შინაარსზე საუბრისგან როდესაც დაცლილი არიან პოლიტიკური პარტიები, იწყებენ მანდატების ჩახსნით საუბარს. მანდატებთან დაკავშირებით ჩვენ მაშინ მივიღებთ გადაწყვეტილებას, როდესაც ამას გადავწყვეტთ და ეს არ იქნება არც „ნაციონალური მოძრაობის“ და არც ივანიშვილის „ოცნების“ გადასაწყვეტი. ჩვენ ვთქვით – პირველებმა, სხვათა შორის – რომ ამ პარლამენტს ლეგიტიმაციას არ მივცემთ და პირველ სხდომაზე ეს ყველამ ნახა. ამიტომ საკითხთან დაკავშირებით ამ პოზიციაში ჯერჯერობით არაფერი შეცვლილა,“– აღნიშნა ლილუაშვილმა.

ჟურნალისტის კითხვაზე, პარლამენტში სიარულზე უარის თქმა და სიების არჩახსნა ხომ არ ნიშნავს ბოიკოტს, ლილუაშვილმა უპასუხა, რომ ბოიკოტი სხვა ტექნიკური პროცედურაა.

„ბოიკოტი კიდევ სხვა ტექნიკური პროცედურაა, რომელსაც თავისი პოლიტიკური მნიშვნელობა აქვს. ეს სხვა, ბევრად უფრო მძიმე პოლიტიკური წონის გადაწყვეტილებაა, როდესაც პარლამენტს არ აღიარებ და არ აძლევ ლეგიტიმაციას და არ ხარ პარლამენტში წარმოდგენილი. ჩვენ ხომ არ ვსაუბრობთ ბოიკოტის დაწერაზე ან სხვა რაიმე ფორმით კიდევ პროტესტის დაფიქსირებაზე, ეს ჩვენი არსენალის ნაწილია და ამას როდის და რა ფორმით გავაკეთებთ, ჩვენი პოლიტიკური ტაქტიკის და სტრატეგიის ნაწილია“, – განაცხადა ლილუაშვილმა.