პოლიტიკა

ეს ხალხი აპროტესტებს დღეს იმას, რაც მათმა რჩეულმა ლიდერმა მემკვიდრეობით დაუტოვა საქართველოს - ირაკლი სესიაშვილი აქცია „არა ოკუპაციას“ აკრიტიკებს

პარლამენტის თავდაცისა და უშიშროების კომიტეტის თავმჯდომარემ, ირაკლი სესიაშვილმა დღეს საოკუპაციო ხაზთან მცოცავი ოკუპაციის წინააღმდეგ გამართულ აქციას გამოეხმაურა. მისი შეფასებით, ეს შეკრება არ იყო განყენებული პოლიტიკური პროცესებისგან და ზოგიერთი პოლიტიკური ძალის ინტერესს ემსახურებოდა.

„უპირველეს ყოვლისა, ყველა მოქალაქეს აქვს იმის უფლება და, შეიძლება, გარკვეული შინაგანი მოთხოვნილებაც, რომ ადგილზე ჩავიდეს და იქვე გააპროტესტოს, იმიტომ რომ ეს [მცოცავი ოკუპაცია] ეწინააღმდეგება მსოფლიოს ცივილიზებულ მიდგომებსა და წესებს. მაგრამ, თუ ჩვენ დავაკვირდებით ამ პროცესს, ეს არაა განყენებული პოლიტიკური პროცესისგან. აქ მე სუფთა გულწრფელობას რომ ვხედავდე იმ ადამიანების მხრიდან, ვინც დღეს იქ ისხდნენ და იდგნენ, მერწმუნეთ, მეც იქ ვიქნებოდი. თუმცა საქმე, რა თქმა უნდა, ასე არ კეთდება. რა თქმა უნდა, იქ იყვნენ გულანთებული ადამიანები, რომლებისთვისაც ისევე, როგორც თითოეული ჩვენგანისთვის, მიუღებელია ოკუპაცია, მაგრამ ეს ადამიანები არიან იმ პოლიტიკური ძალების, რა თქმა უნდა ყველაზე არ ვეძახი, ინტერესების მატარებლებლები. ძირითადად „ნაციონალური მოძრაობის“ აქტივს ვხედავდი, ახალ და ძველ „ნაცებს“. ეს ხალხი აპროტესტებს დღეს იმას, რაც მათმა რჩეულმა ლიდერმა მემკვიდრეობით დაუტოვა საქართველოსა და საქართველოს ისტორიას“, - განაცხადა სესიაშვილმა ტვ პირველის ეთერში.