პოლიტიკა
ევროკავშირის წარმომადგენლობა ოფიციალურად ემიჯნება ჰერბერტ ზალბერის განცხადებას - ლევან იზორია
საქართველოს თავდაცვის მინისტრის, ლევან იზორიას თქმით, ევროკავშირის წარმომადგენლობა ოფიციალურად ემიჯნება სამხრეთ კავკასიასა და საქართველოს კრიზისების საკითხებში ევროკავშირის სპეციალური წარმომადგენლის ჰერბერტ ზალბერის მიერ ბიბილოვის მისამართით გაკეთებულ განცხადებას.
„როგორც მაქვს ინფორმაცია, ევროკავშირის ოფიციალურმა წარმომადგენლობამ გააკეთა განცხადება - ეს არის მისი პირადი განცხადება, რომელიც არავითარ კავშირში არ არის ევროკავშირის ოფიციალურ პოლიტიკასთან და კურსთან. მწვავედ დააყენა ეს საკითხი საგარეო საქმეთა სამინისტრომ, ევროკავშირის წარმომადგენელიც იყო დაბარებული სამინისტროში განმარტებისთვის. ჩვენი მკაცრი და მკაფიო პოლიტიკა არის არ აღიარების პოლიტიკა და ჩვენ ამ პოლიტიკას ბოლომდე გავაგრძელებთ", - განაცხადა იზორიამ.
შეგახსენებთ, რომ ჰერბერტ ზალბერი ოკუპირებული სამხრეთ ოსეთის ე.წ. პრეზიდენტ ანატოლი ბიბილოვს შეხვდა და მას ე.წ. საპრეზიდენტო არჩევნებში გამარჯვება მიულოცა. ამის გამო ის დღეს ხვდება საქართველოს საგარეო საქმეთა მინისტრის მოადგილეს დავით დონდუას.
ანა მებურიშვილი