საზოგადოება

განათლების სამინისტრო შეისწავლის „არტეკში“ მოსწავლეების გაგზავნაში იყო თუ არა მიზანმიმართული ქმედება

საქართველოს განათლებისა და მეცნიერების სამინისტრო რუსული ენის უკეთ შესწავლის მიზნით, თბილისის 166-ე სკოლის ექვსი მოსწავლის ანექსირებულ ყირიმში, საერთაშორისო საბავშვო ცენტრ „არტეკში“ გამგზავრების საკითხს გამოეხმაურა.

უწყების მიერ გავრცელებულ განცხადებაში ნათქვამია, რომ საქართველოს ხელისუფლება გმობს რუსეთის მიერ ყირიმის ანექსიას და კიდევ ერთხელ აფიქსირებს ურყევ პოზიციას უკრაინის ტერიტორიული მთლიანობის მიმართ.

ამასთან, განათლების სამინისტრო ყველა სკოლის ადმინისტრაციას და მასწავლებლებს მოუწოდებს მომავალში გაცნობიერებული არჩევანი გააკეთონ.

„სამწუხაროა, რომ სკოლის ადმინისტრაციამ ან ერთმა კონკრეტულმა მასწავლებელმა გაუთვითცნობიერებელი გადაწყვეტილება მიიღო, რის გამოც სკოლის მოსწავლეები რუსეთის მიერ ანექსირებულ ყირიმში მოხვდნენ.

ჩვენი ხელისუფლების პოზიცია ურყევია და ვგმობთ რუსეთის მიერ ყირიმის ანექსიას და კიდევ ერთხელ ვაფიქსირებთ ჩვენს ურყევ პოზიციას უკრაინის ტერიტორიული მთლიანობის მიმართ.

მოვუწოდებთ ყველა სკოლის ადმინისტრაციას და მასწავლებელს მომავალში მიიღონ მეტი ინფორმაცია და გააკეთონ გაცნობიერებული არჩევანი.

ქართულ მხარეს უკვე ჰქონდა შესაბამისი კომუნიკაცია უკრაინულ მხარესთან, რა დროსაც მათ განემარტათ მომხდარი. განათლებისა და მეცნიერების სამინისტრო კომპეტენტურ ორგანოებთან ერთად შეისწავლის, იყო თუ არა ეს მასწავლებლის ინდივიდუალური გადაწყვეტილება თუ მიზანმიმართული ქმედება“,-ნათქვამია განცხადებაში.

თბილისის 166-ე საჯარო სკოლის ექვსი მოსწავლე, ოკუპირებულ ყირიმში, ბანაკ „არტეკში“ გაემგზავრა.