სამართალი

გორში 14 წლის წინ დაკარგული ბიჭის ცხედარს ეძებენ

გორში სამართალდამცველები 14 წლის წინ გაუჩინარებული ბავშვის ცხედრის ძებნას განაგრძობენ.

სამძებრო ღონისძიებები ამ დრომდე აქტიურად მიმდინარეობს. კულტურისა და დასვენების პარკის ტერიტორია პოლიციას აქვს შემოსაზღვრული. ადგილზე სამართალდამცველებთან ერთად, 2004 წელს გაუჩინარებული ზაქრო ბერძენიშვილის ოჯახის წევრებიც იმყოფებიან.

ჯერჯერობით სამართალდამცველები არც უარყოფენ და არც ადასტურებენ ინფორმაციას, რომ გორში, კულტურისა და დასვენების პარკის ტერიტორიაზე, სწორედ 2004 წელს გაუჩინარებული 11 წლის მოზარდის სამძებრო ღონისძიებები მიმდინარეობს.

გაუჩინარებული ბავშვის ოჯახის წევრები საგამოძიებო მოქმედებების შესახებ დეტალურ ინფორმაციას არ ფლობენ, თუმცა, სავარაუდოა, რომ 9 წლის გოგონას სასტიკ მკვლელობაში ბრალდებულმა იაგო ნებიერიძემ სამართალდამცველებს 14 წლის გაუჩინარებული ბავშვის ცხედრის ადგილსამყოფელად სწორედ ეს ტერიტორია მიუთითა და ახლა იქ სამძებრო ღონისძიება მიმდინარეობს.

იაგო ნებიერიძის სახაზინო ადვოკატის, მაია გრიგოლიშვილის თქმით, მას გაუთქმელობის პირობა აქვს დადებული და საკითხის დეტალებთან დაკავშირებით ვერ ისაუბრებს.

„მიმდინარეობს გამოძიება, მაგრამ ამ ეტაპზე კონკრეტულად რა მტკიცებულებებია საქმეში, ამაზე ვერ ვისაუბრებ, ვინაიდან მოგეხსენებათ, რომ ხელწერილი მაქვს, არ გავამჟღავნო საქმესთან დაკავშირებული არანაირი ინფორმაცია“, - განაცხადა გრიგოლიშვილმა.

იურისტის თქმით, მისი დაცვის ქვეშ მყოფის პოზიციიდან გამომდინარე, დამატებით განცხადებას ვერ გააკეთებს. მას არ დაუკონკრეტებია, აღიარა თუ არა იაგო ნებიერიძემ 14 წლის წინ ჩადენილი დანაშაული.

„ჩემთვის არ არის ცნობილი და შესაბამისად, ბრალდებულის ინტერესებიდან გამომდინარე, მე მეტს ვერაფერს ვერ გიპასუხებთ. არ საუბრობს არანაირ საქმესთან დაკავშირებით“, - განაცხადა უფლებადამცველმა.

ზაქრო ბერძენიშვილის სამძებრო სამუშაოები 2004 წელსაც მიმდინარეობდა, როდესაც ბავშვი დაიკარგა. ძებნის პროცესებში ჩართული იყვნენ კინოლოგები. ძაღლმა კვალი სწორედ კულტურისა და დასვენების პარკის მიმართულებით აიღო და კვალი სწორედ იმ ადგილას დაკარგა, სადაც დღეს სამძებრო სამუშაოები მიმდინარეობს.