კონფლიქტის ზონა

ხელისუფლება ყველაფერს აკეთებს, აფხაზ და ოს თანამოქალაქეებთან შერიგების ახალი შესაძლებლობების გაჩენისთვის - მიხეილ ჯანელიძე

საქართველოს საგარეო საქმეთა მინისტრის მიხეილ ჯანელიძის განცხადებით, ხელისუფლება ყველაფერს აკეთებს, აფხაზ და ოს თანამოქალაქეებთან შერიგების ახალი შესაძლებლობების გაჩენისთვის.

ახალ სამშვიდობო მისიაზე - „ნაბიჯი უკეთესი მომავლისკენ“, „ამერიკის ხმასთან“ საუბრსას მინისტრმა აღნიშნა, რომ კონფლიქტის მშვიდობიანი დარეგულირებისთვის, უპირველეს ყოვლისა, აუცილებელია რუსეთმმა ოკუპირებული რეგიონების დეოკუპცია მოახდინოს, თუმცა, როგორც ის ამბობს, საქართველო რუსეთის კეთილ ნებაზე ვერ იქნება დამოკიდებული და მის ნაბიჯებს ვერ დაელოდება.

“საქართველოს მთავრობას აქვს ერთი ძალიან მნიშვნელოვანი მიმართულება აღებული, რომელსაც ყოველგვარი ბარიერების მიუხედავად ძალიან მიზანმიმართულად ახორციელებს – კონფლიქტის მშვიდობიანი დარეგულირება. კონფლიქტის მშვიდობიან დარეგულირებას მრავალი მიმართულება აქვს. პირველ რიგში საჭიროა, რომ რუსეთმა მოახდინოს ოკუპირებული რეგიონების დეოკუპაცია, შეასრულოს ცეცხლის შეწყვეტის შეთანხმებით ნაკისრი ვალდებულებები, ხელი არ შეუშალოს და მისცეს საშუალება საოკუპაციო ხაზით გაყოფილ საზოგადოებებს შორის შედგეს რეალური შერიგების პროცესი. მაგრამ, რა თქმა უნდა, ჩვენ რუსეთის კეთილ ნებაზე ვერ ვიქნებით დამოკიდებული და ვერ დაველოდებით მის ნაბიჯებს”, – განაცხადა მიხეილ ჯანელიძემ.

ჯანელიძის თქმით, საოკუპაციო რეჟიმი ოკუპირებული ტერიტორიების მაქსიმალურ იზოლაციას ახდენს და მთავრობას უნდა, რომ გააკეთოს მაქსიმუმი, რათა ადამიანებმა, რომლებიც ცხოვრობენ ოკუპირებულ ტერიტორიებზე მიიღონ ახალი შესაძლებლობები.

„სწორედ ამის გამო, პრემიერ-მინისტრი ძალიან მნიშვნელოვანი ინიციატივებით გამოვიდა. ეს არის დიდი პაკეტი, რომელიც გულისხმობს ახალ სავაჭრო შესაძლებლობებს, გულისხმობს ახალ შესაძლებლობებს განათლების მიმართულებით და ასევე ახალ შესაძლებლობებს ვიზა ლიბერალიზაციით სარგებლობის მიმართულებით და გადაადგილების მიმართულებით. ეს ვფიქრობთ, რომ არის ძალიან მნიშვნელოვანი იმ ადამიანებისთვის, რომლებიც ცხოვრობენ ოკუპირებულ ტერიტორიებზე დღეს, არიან ოკუპაციის წნეხის ქვეშ და შეზღუდული აქვთ ბევრი შესაძლებლობა სწორედ ამ ოკუპაციის გამო,“- ამბობს ჯანელიძე.

ცირა გურგენიძე