სამართალი

მე უკვე სარჩელს ვამზადებ სტრასბურგისთვის - ბაჩანა შენგელია

„ეს იყო აბსოლუტურად უკანონო, სრულიად დაუსაბუთებელი და უპასუხისმგებლო გადაწყვეტილება”, - ასე აფასებს ზუგდიდის მეექვსე სკოლის ყოფილი დირექტორის ია კერზაიას შვილი ბაჩანა შენგელია, გენერალური პროკურატურის გადაწყვეტილებას საქმის შეწყვეტის შესახებ.

ბაჩანა შენგელია აცხადებს, რომ საქართველოში გასაჩივრების საშუალება არ აქვს, რის გამოც, ის სტრასბურგის სასამართლოსთვის აპირებს მიმართვას.

„ეს იყო აბსოლუტურად უკანონო, სრულიად დაუსაბუთებელი და უპასუხისმგებლო გადაწყვეტილება, ვინაიდან პროკურატურამ ამ საქმეზე არ გააკეთა არაფერი. უფრო სწორად, ყველაფერი გააკეთა იმისთვის, რომ არ გამოეძიებინა ეს საქმე, არ ამოიღო საჭირო მტკიცებულებები, სათვალთვალო კამერებიდან გააქრო მასალები, რომელიც დაადასტურებდა, რომ იქ საჩივარი არავის არ შეუტანია. უამრავი საპროცესო მოქმედება არ ჩაატარა, მათ შორის არ ჩაატარა ექსპერტიზა, ექსპერტის არ მიაწოდა მასალები გამოსაკვლევად.

აბსოლუტურად ყველაფერი გააკეთეს იმისთვის, რომ ამ შედეგამდე მოსულიყვნენ დღეს და 23 აგვისტოს, ღამე, იმ დროს, როდესაც თვითონაც ხვდებიან, რომ საქმის შეწყვეტას არ მოყვეს შესაბამისი რეზონანსი და შესაბამისი ხმაური. ასე ქურდულად გადაწყვიტეს, რომ ეს საქმე შეეწყვიტათ და ჩემთვის მოესპოთ ყველანაირი საშუალება, რომ სამართლებრივ სივრცეში, ამ პროკურატურის გამოძიების ფარგლებში გვედავა“, – ამბობს ბაჩანა შენგელია.

ბაჩანა შენგელია აცხადებს, რომ საქმე თავიდან ბოლომდე, პოლიტიკური იყო.

„მე არ ჩამრთეს დაზარალებულადაც კი ამ საქმეში ცხრა თვის განმავლობაში და არ მექნება ამ გადაწყვეტილების საქართველოში გასაჩივრების უფლება. თუმცა, მე უკვე სარჩელს ვამზადებ სტრასბურგისთვის და ეს იქნება ის ბოლო, რომელსაც მე დავდებ უკვე ამ საქმეში. ეს იყო პოლიტიკური საქმე თავიდან ბოლომდე, ეს იყო პირადად გახარიას კონტროლქვეშ მიმდინარე გამოძიება და მისი დანაშაული იკვეთებოდა ამ საქმეში და ბუნებრივია, ის არ დაუშვებდა, რომ დანაშაული გახსნილიყო და დამნაშავეები დასჯილიყვნენ.

შესაბამისად, ეს დაკვეთა პროკურატურამ წარმატებით შეასრულა და დღეს სრულიად უკანონოდ შეწყვიტა ეს საქმე და დაასრულა ამით გამოძიება თავისი გადმოსახედიდან. თუმცა, ბრძოლა გრძელდება. მე ყველანაირ საშუალებებს მივმართავ, თუნდაც საერთაშორისო სასამართლოში და საბოლოოდ იქნება შედეგი ის, რომ ყველა დამნაშავე აბსოლუტურად – გახარიას ხელმძღვანელობით და ბატიაშვილის ხელმძღვანელობით, აუცილებლად დაისჯებიან ამ საქმეზე“, – აღნიშნა პირველ არხთან საუბარში ბაჩანა შენგელიამ.

შეგახსენებთ, რომ გენერალური პროკურატურის ცნობით, დანაშაულის ნიშნების არარსებობის საფუძველზე ზუგდიდის N6 საჯარო სკოლის ინსპექტირებასთან დაკავშირებულ სისხლის სამართლის საქმეზე გამოძიება შეწყდა.