საზოგადოება

მერაბ დვალიშვილი საქართველოში ქველმოქმედებას აპირებს

UFC-ის ქართველი ჩემპიონი მერაბ დვალიშვილი საქართველოში საქველმოქმედო საქმიანობის დაწყებას აპირებს. მან შესაბამისი განცხადება თბილისში, „a People-ის“ ოფისში გამართულ პრესკონფერენციაზე გააკეთა. გულშემატკივრებსა და ჟურნალისტებთან საუბრისას იგი საქართველოს პრემიერ-მინისტრ ირაკლი კობახიძის გადაწყვეტილებას გამოეხმაურა, რომლის თანახმადაც, მასა და ასევე UFC-ის ჩემპიონ ილია თოფურიას სახელმწიფოსაგან ჯილდოდ მილიონ-მილიონი ლარი გადაეცემათ.

„მინდა ქველმოქმედება დავიწყო და საქართველოს რეგიონებში პატარ-პატარა დარბაზები გავხსნა. ეს იქნება ჯიუ-ჯიცუსა და ჭიდაობის დარბაზები, სადაც ახალგაზრდებს ვარჯიშის საშუალება მიეცემათ. ახლა დაანონსდა, რომ სახელმწიფო მეც და ილიასაც მილიონ-მილიონს გვაძლევს, რისთვისაც მადლობას ვიხდი. ამ თანხასაც დავიმატებ და ჩემს ქველმოქმედებაში სრულად გამოვიყენებ“, - განაცხადა მერაბ დვალიშვილმა.

მისივე თქმით, შერეულ საბრძოლო ხელოვნებაში სპორტსმენების მოსამზადებლად ვარჯიში საქართველოშიც შეიძლება.

მერაბ დვალიშვილმა მადლიერება ქართველი ხალხის მხრიდან მის მიმართ გამოვლენილი სიყვარულის გამოც გამოხატა. მან აღნიშნა, რომ „ჯერ ადამიანი უნდა იყო და მერე სპორტსმენი“.

„ჩემთვის მთავარია, ვიყო ჰუმანური“, - აცხადებს ჩემპიონი.

მისივე მოსაზრებით, სპორტსმენი არასდროს უნდა დანებდეს.

„ჩვენ ინდივიდუალური, დამოუკიდებელი სპორტსმენები ვართ. ყველაფერი შესაძლებელია. შეიძლება, დამარცხდე; შეიძლება, ჯანმრთელობის მდგომარეობის, ან მსაჯების გამო შეგექმნას პრობლემები, მაგრამ არასდროს უნდა დანებდე“, - მიიჩნევს მერაბ დვალიშვილი.

შეგახსენებთ, რომ UFA-ს მეორე ქართული ქამარი ილია თოფურიას შემდეგ სწორედ მერაბ დვალიშვილმა მოიპოვა. იგი შერეული საბრძოლო ხელოვნების (MMA) მთავარი ორგანიზაციის აბსოლუტური საბრძოლო ჩემპიონატის (UFC) ქამრის მფლობელი სუპერმსუბუქ წონით კატეგორიაში გახდა. მან ლას-ვეგასში 15 სექტემბერს გამართულ ორთაბრძოლაში მოქმედი ჩემოიონი შონ ო’მალი დაამარცხა.

მერაბ დვალიშვილი საქართველოში „აჭარაბეთის“ მოწვევით იმყოფება.