მსოფლიო

მიხეილ სააკაშვილი კიევის პეჩორის სასამართლოში გადაიყვანეს - დღეს მისი სასამართლო პროცესი უნდა ჩატარდეს

დღეს უკრაინის სასამართლომ უნდა იმსჯელოს საქართველოს ყოფილი პრეზიდენტისა და ოდესის ექს-გუბერნატორისთვის, მიხეილ სააკაშვილისთვის აღკვეთის ღონისძიების შეფარდების შესახებ.

დღეს საღამოს იწურება მიხეილ სააკაშვილი დროებითი მოთავსების იზოლატორში ყოფნის ვადა, მანამდე კი სასამართლო უნდა ჩატარდეს.

უკრაინული მედიის ინფორმაციით, ოდესის ექს-გუბერნატორი უკვე გადაიყვანეს კიევის პეჩორის რაიონულ სასამართლოში.

მიხეილ სააკაშვილი კიევში 8 დეკემბერს დააკავეს. მედიის ინფორმაციით, მიხეილ სააკაშვილის დაკავება უკრაინის ნაციონალური პოლიციის ერთ-ერთი დეპარტამენტის ხელმძღვანელის ბინაში მოხდა.

სააკაშვილის წინააღმდეგ გამოძიება სამი მუხლით მიმდინარეობს, ესენია: უკრაინის სისხლის სამართლის კოდექსის 15-ე მუხლი (თავდასხმა, დანაშაულის მცდელობა), 28-ე მეორე მუხლის მეორე ნაწილი (დანაშაულის ჩადენა პირთა ჯგუფის მიერ წინასწარი განზრახვით) და 256-ე მუხლის მეორე ნაწილი (დანაშაულებრივი ჯგუფის წევრთა ხელშეწყობა და მათი დანაშაულებრივი საქმიანობის დამალვა).

ანა მებურიშვილი