მსოფლიო

მიხეილ სააკაშვილის ორი მომხრეა გადაყვანილი პოლიციაში - უკრაინის შსს

უკრაინის შინაგან საქმეთა სამინისტროს კომუნიკაციის დეპარტამენტის ხელმძღვანელმა არტიომ შევჩენკომ უარყო მიხეილ სააკაშვილის თანამებრძოლის, დავით საყვარელიძის განცხადება მათი მხარდამჭერების მასობრივი დაკავებების შესახებ. ამის შესახებ მან Цензор.НЕТ-ს განუცხადა.

შევჩენკოს ინფორმაციით, ორი პირია გადაყვანილი პოლიციის დეპარტამენტში საგამოძიებო მოქმედებების გასატარებლად.

„მასობრივ ხასიათზე საუბარი არაა. ორი პირია გადაყვანილი პოლიციის განყოფილებაში საგამოძიებო მოქმედებების გასატარებლად. მათ პროცესუალურ სტატუსზე ეროვნული პოლიცია მოგვიანებით გაავრცელებს ინფორმაციას“, -აღნიშნა შევჩენკომ.

რაც შეეხება სააკაშვილის განცხადებას ამერიკელი დოკუმენტალისტების დაკავების შესახებ, შევჩენკომ განაცხადა, რომ აღნისნულ ინფორმაციას არ ფლობს,.

„თუ საზღვარი უკანონოდ გადაკვეთეს და მათი ბრალეულობა დადგინდება, მაშინ გატარდება ყველა აუცილებელი მოქმედება ადმინისტრაციული კანონმდებლობის ფარგლებში“,-თქვა შევჩენკომ.

შეგახსენებთ, დღეს პარტია „ახალი ძალების მოძრაობის“ წევრმა, დავით საყვარელიძემ ფეისბუკის საკუთარ გვერდზე დაწერა, რომ სააკაშვილის მხარდამჭერების წინააღმდეგ რეპრესიები დაიწყო. მისივე ინფრმაციით, დააკავეს 10 სექტემბრის ამბების ორი მონაწილე ანდრეი კოტიჩენკო და ალექსანდრ ბურცევი.

შეგახსენებთ, 10 სექტემბერს 20 საათზე მიხეილ სააკაშვილმა თავის მხარდამჭერებთან ერთად სასაზღვრო-გამშვები პუნქტი შეგინი გადაკვეთა. ის ახლა ლვოვში იმყოფება.

აღნიშნულ ფაქტზე სისხლის სამართლის საქმეა აღძრული უკრაინის სსკ-ის 332-ე მუხლით, რაც სახელმწიფო საზღვარზე პირების უკანონოდ გადაყვანას გულისხმობს, ასევე ადგილობრივი შსს-ის ინფორმაციით, ინციდენტი სისხლის სამართლის კოდექსის 348-ე მუხლის დანაშაულის ნიშნებსაც შეიცავს.

ანა მებურიშვილი