მსოფლიო

მოლაპარაკებების მეორე რაუნდი უნდა ეხებოდეს ხელისუფლების მშვიდ გადაბარებას - ნიკოლ პაშინიანი

სომხეთში სერჟ სარგსიანის პრემიერობის წინააღმდეგ მიმართული აქციების ერთ-ერთი ორგანიზატორის, პარტია „სამოქალაქო შეთანხმების“ ლიდერის, ნიკოლ პაშინიანის თქმით, მთავრობასთან დაგეგმილი მოლაპარაკებების მთავარი მიზანი იქნება ხელისუფლების მშვიდი გადაბარება. ამის შესახებ პაშინიანმა ფეისბუკზე გამოქვეყნებულ ვიდეოში განაცხადა.

„თქვენ იცით, რომ მთავრობასთან მოლაპარაკებების მეორე რაუნდი ხვალ უნდა გაიმართოს და ეს მოლაპარაკებები უნდა ეხებოდეს ხელისუფლების მშვიდ გადაბარებას. ხვალ საღამოს ჩვენ კვლავ გავმართავთ მიტინგს რესპუბლიკის მოედანზე, 19 საათზე, რათა გაცნობოთ, თუ როგორ მიმდინარეობს მოლაპარაკებები და რა უნდა გავაკეთოთ იმისთვის, რომ მივიყვანოთ ჩვენი ხავერდოვანი არაძალადობრივი ეროვნული რევოლუცია ლოგიკურ და სრულყოფილ დასასრულამდე“, -თქვა პაშინიანმა.

მან განმარტა, რომ სომეხთა გენოციდის მსხვერპლთა ხსოვნის დღესთან დაკავშირებით მისი მომხრეები ღონისძიებათა ფარგლებში იმოქმედებენ, თუკი არაფერი ექსტრაორდინალური არ მოხდება.

ხვალ პაშინიანი სომხეთის პრემიერობის დროებითი მოვალეობის შემსრულებელს კარენ კარაპეტიანს შეხვდება. კვირას, სერჟ სარგსიანთან მოლაპარაკებების შემდეგ პაშინიანი მალევე დააკავეს.

ცნობისთვის, სომხეთში 11-დღიანი საპროტესტო აქციების შედეგად ქვეყნის პრემიერმა სერჟ სარგსიანმა თანამდებობა დატოვა.