პოლიტიკა
მცოცავი ოკუპაციის გამო ხელისუფლების კრიტიკა მიუღებელი და უსამართლოა - ვიქტორ დოლიძე
ევროპულ და ევროატლანტიკურ სტრუქტურებში ინტეგრაციის საკითხებში სახელმწიფო მინისტრის, ვიქტორ დოლიძის განცხადებით, არასამართლიანია ის კრიტიკა, რაც მცოცავი ოკუპაციის გამო მთავრობის მიმართ ისმის.
მინისტრის თქმით, მთავრობის მიერ ქმედითი ნაბიჯები გადაიდგა ოკუპირებულ ტერიტორიებთან დაკავშირებით, რასაც ამერიკის შეერთებული შტატების კონგრესის მიერ მიღებული დოკუმენტებიც ადასტურებს.
„არასამართლიანია ეს კრიტიკა, არასდროს, ოკუპაციის შემდეგ, მე არ ვგულისხმობ მხოლოდ 2008 წელს, არ მომხდარა ისეთი სერიოზული ნაბიჯების გადადგმა, როგორც მოხდა ახალი ხელისუფლების პირობებში. ამაზე მეტყველებს ამერიკის შეერთებული შტატების კონგრესის მიერ მიღებული დოკუმენტებიც. აქედან გამომდინარე, კრიტიკა მიუღებელი და უსამართლოა. ჩვენ უნდა ვიყოთ შედეგებზე ორიენტირებული. ვდგამთ ნაბიჯებს, რომელსაც შედეგები მოჰყვება. ვერ მივიღებ იმ ხალხის კრიტიკას, ვინც საქმე მხოლოდ და მხოლოდ გააფუჭა“, - განუცხადა დოლიძემ ჟურნალისტებს.
დოლიძემ აღნიშნა, რომ კარასინი-აბაშიძის დიალოგს მნიშვნელოვანი შედეგები არ მოაქვს, თუმცა ამ ფორმატის შენარჩუნება იმისთვისაა საჭირო, რომ რუსეთსა და საქართველოს შორის დიალოგის მცირე შესაძლებლობა შენარჩუნდეს.
„კარასინი-აბაშიძის ფორმატი განსაკუთრებული შედეგების მატარებელი არ არის, თუმცა მნიშვნელოვანი ფორმატია სულ მცირე იმისთვის, რომ დიალოგი შენარჩუნდეს და იყოს საუბარი ისეთ საკითხებზე, როგორიც არის ვაჭრობა, ეკონომიკა, ჰუმანიტარული თემები. უსაფრთხოების თემებზე სასაუბროდ არის ჟენევის ფორმატი. განსაკუთრებულ შედეგებს ამ ფორმატიდან არ ველოდებით, გარდა იმ თემებისა, რომლებიც ჩამოვთვალეთ. თუმცა კარგია, რომ ეს ფორმატი არსებობს და ამაზე საუბრობს ყველა საერთაშორისო ორგანიზაციაც“, - განაცხადა დოლიძემ.
შეგახსენებთ, რომ 19 ივნისს გორის რაიონ სოფელ ბერშუეთთან საოკუპაციო ძალებმა საზღვრის აღმნიშვნელი ბანერი დაამონტაჟეს, რის გამოც 10 ჰექტარი მიწა ოკუპაციის ხაზს მიღმა აღმოჩნდა.