პოლიტიკა

ნატოს საპარლამენტო ასამბლეა რამდენიმე დღეში საქართველოს ეწვევა- იენს სტოლტენბერგი

ნატოს გენერალური მდივნის იენს სტოლტენბერგის განცხადებით, ნატოს საპარლამენტო ასამბლეის სხდომა თბილისში რამდენიმე დღეში გაიმართება.

„მოამბესთან“ საუბრისას მან აღნიშნა, რომ ეს ვიზიტი ადასტურებს ალიანსის მხარდაჭერას საქართველოსადმი.

„ნატოს საპარლამენტო ასამბლეა ეწვევა საქართველოს რამდენიმე დღეში. გენმდივნის მოადგილე იქნება პარლამენტარებთან ერთად თბილისში. ეს მიუთითებს ჩვენს თანამშრომლობაზე, კონტაქტებზე და თუ რა დონის პოლიტიკური დიალოგი გვაქვს საქართველოსთან და ასევე, რა პრაქტიკულ მხარდაჭერას ვუცხადებთ. საქართველო მნიშვნელოვანი კონტრიბუტორია მისიებსა და ოპერაციებში. ჩვენ ამ წვლილის გამო საქართველოს მადლიერი ვართ“,- განაცხადა სტოლტენბერგმა.

მან ხაზი გაუსვა საქართველოსა და ნატოს შორის სხვადასხვა ფორმის თანამშრომლობას.

სტოლტენბერგმა ასევე განაცხადა, რომ ძალაში რჩება ვარშავაში მიღებული გადაწყვეტილება ღია კარის პოლიტიკის შესახებ. მისი თქმით, ამას დაადასტურებს მონტენეგროს მაგალითი, რომლის ორგანიზაციაში შესვლის რატიფიკაცია მოხდა.

ანა მებურიშვილი