არქივი
მსოფლიო
ორი ადამიანი დაიღუპა მეხიკოში უნივერსიტეტთან სროლის დროს
ორი ადამიანი დაიღუპა მეხიკოს ავტონომიური ეროვნული უნივერსიტეტის მახლობლად ატეხილი სროლის დროს. მექსიკის გენერალური პროკურატურის განცხადებით, გარდაცვლილები 20 და 29 წლისები იყვნენ.
გარდაცვლილები სასწავლებლის დაცვამ ჯერ კიდევ ცოცხლები იპოვა. დაჭრილები საავადმყოფოში გადაყვანეს, თუმცა მათი გადარჩენა ვერ მოხერხდა.
გამოძიების ვერსიით, შესაძლოა შეტაკება ორ ერთმანეთთან დაპირისპირებულ დაჯგუფებას შორის მოხდა, რომლებმაც ერთმანეთში საქმის გასარჩევად ეს ტერიტორია ამოარჩიეს.
უნივერსიტეტის განცხადებით, დაღუპულები არც სტუდენტები არიან და არც უნივერსიტეტის თანამშრომლები.მათი ვინაობა ჯერ ცნობილი არ გამხდარა. პოლიცია სათვალთვალო კამერების ჩანაწერებს სწავლობს.
აღნიშნულ უნივერსიტეტში 350 000 სტუდენტი სწავლობს. მათი დიდი ნაწილი უნივერსიტეტის მთავარ კამპუსში სწავლობს, რომელიც იუნესკოს მსოფლიო მემკვიდრეობის ძეგლთა სიაშია.
ცირა გურგენიძე