საზოგადოება
პრეზიდენტის ცოლის ძმას 4-წლიანი პატიმრობა შეეფარდა
თბილისის საქალაქო სასამართლოს გადაწყვეტილებით, პრეზიდენტის ცოლის, მაკა ჩიჩუას ძმას, მიხეილ მგალობლიშვილს 4-წლიანი პატიმრობა შეეფარდა.
როგორც თბილისის საქალაქო სასამართლოს განცხადებაში წერია, პირადი ჩხრეკის შედეგად ამოღებულ იქნა ბრაუნინგის კონსტრუქციის 1922 წლის მოდელის 7.65 მმ-იანი კალიბრის პისტოლეტი ერთი მჭიდით, მასში მოთავსებული 1900 წლის ნიმუშის 7.65მმ კალიბრის ერთი ცალი ვაზნით. ასევე, მიხეილ მ.-ს საცხოვრებელი სახლის ჩხრეკისას, სამართალდამცველებმა ამოიღეს ქარხნული წესით წარმოებული, 1934 წლის 7.65 მმ ცეცხლსასროლი იარაღი, რომელიც გადაკეთებულია 1951 წლის ნიმუშის 9მმ კალიბრის ვაზნების გასასროლად.
როგორც მგალობლიშვილის დამ, მაკა ჩიჩუამ განაცხადა, ბრალდებულმა იარაღის გადაფორმება ვერ მოასწრო.
„მამამისი რომ გარდაიცვალა 3 თვის წინ და წამოიღო იმ სახლიდან, მან ვერ მოასწრო უბრალოდ გადაფორმება. ეს მისი ბრალი არ იყო“, - განაცხადა ჩიჩუამ.
ჩიჩუას თქმით, იარაღი უვარგისია და უფრო სამუზეუმო ექსპონატად გამოდგება.
სასამართლოს განცხადებით, ღია სასამართლო სხდომებზე, ბრალდებულმა დაადასტურა იარაღის შენახვა-ტარების ფაქტი, თუმცა მიუთითა რომ ისინი მემკვიდრეობით მიიღო მამისგან.
მგალობლიშვილის ადვოკატის, გიორგი ბებიაშვილის თქმით, საპროცესო შეთანხმების გაფორმების შესახებ მოლაპარაკება მიმდინარეობს.
„მოსამართლემ არ გამოიყენა ჩემ მიერ შუამდგომლობაში დაყენებული სისხლის სამართლის კოდექსის 50-ე მუხლი, რომელიც ითვალისწინებს მინიმალურ სასჯელზე ისევ სასჯელის ჩამოკლებას. ისევ მიმდინარეობს საპროცესოს მოლაპარაკება შეთანხმებაზე და არაა გამორიცხული, რომ შემდგომში საპროცესო შეთანხმება გაფორმდეს“, - განაცხადა ბებიაშვილმა.
მგალობლიშვილი 2017 წლის 11 იანვარს დააკავეს იარაღის მართლსაწინააღმდეგო შეძენა-შენახვა-ტარებისთვის., რაც 4-დან 6- წლმადე პატიმრობას ითვალისწინებს.
ანა მებურიშვილი