პოლიტიკა
პრეზიდენტთან გვქონდა საუბარი შესაძლო ვეტოზე - ხოშტარია ე.წ. ფარული მოსმენების კანონზე
საპარლამენტო ფრაქცია „ევროპული საქართველოს“ წევრმა, ელენე ხოშტარიამ პრეზიდენტთან დღევანდელი საკონსულტაციო შეხვედრა შეაფასა, სადაც ახლად მიღებული ე.წ. მოსმენების კანონი განიხილებოდა. მისი თქმით, „ევროპული საქართველოსა“ და პრეზიდენტის შეხედულებები ამ თემაზე ერთმანეთს ემთხცვევა.
ხოშტარიას განცხადებით, პარლამენტის მიერ დამტკიცებული კანონი მოქალაქეებზე ფარულ მოსმენებს გააძლიერებს.
„ჩვენ გვქონდა პრეზიდენტთან კონსულტაცია ე.წ. მოსმენების კანონზე. აქ ჩვენ, რა თქმა უნდა, ძალიან სერიოზული წუხილები გვაქვს და აქ ემთხვევა ჩვენი პოზიციები პრეზიდენტის პოზიციებს. ეს კანონი არსებითად არღვევს საკონსტიტუციო სასამართლოს გადაწყვეტილებას. გარდა ამისა, ეს კანონი მწვანე შუქს უნთებს საქართველოში პირადი ცხოვრების ხელყოფას, ადამიანების უკანონო მოსმენასა და, შესაბამისად, ადამიანების ფუნდამენტური უფლებების დარღვევას. ჩვენ გვქონდა საუბარი შესაძლო ვეტოზე და პრეზიდენტი ამასთან დაკავშირებით მიიღებს გადაწყვეტილებას“, - განაცხადა ხოშტარიამ შეხვედრის დასრულების სემდეგ.
შეგახსენებთ, რომ 1-ლ მარტს პარლამენტმა მესამე მოსმენით მხარი დაუჭირა უმრავლესობის მიერ შემუშავებულ საკონსტიტუციო ცვლილებათა პაკეტს ე.წ. ფარული მოსმენების შესახებ. აღნიშნულ კანონპროექტზე მუშაობა მას შემდეგ გახდა საჭირო, რაც 2016 წლის 14 აპრილს საკონსტიტუციო სასამართლომ ფარული მოსმენების არსებული წესი არაკონსტიტუციურად ცნო. სასამართლომ პარლამენტს დააკისრა ცვლილებების შეტანის ვალდებულება 2017 წლის 31 მარტამდე.
ანა მებურიშვილი