სამართალი
ქართულ მხარეს აზერბაიჯანის პროკურატურიდან ჯერ არ მიუღია პასუხი აფგან მუხთარლის დაკითხვის შუამდგომლობაზე - ირაკლი შოთაძე
ქართულ მხარეს აზერბაიჯანის პროკურატურიდან ჯერ არ მიუღია პასუხი აფგან მუხთარლის დაკითხვის შუამდგომლობაზე, - განუცხადა ჟურნალისტებს მთავარმა პროკურორმა, ირაკლი შოთაძემ.
მისი ინფორმაციით, ამჟამად პროკურატურას გაგზავნილი აქვს აზერბაიჯანში სამართლებრივი დახმარების თაობაზე ორი შუამდგომლობა და ელოდება მათ შესრულებას.
"ამ ეტაპზე შემიძლია გითხრათ, რომ ჩატარებულია საკმაოდ მოცულობითი საგამოძიებო მოქმედებები. ჩვენ ვახორციელებთ საპროკურორო ზედამხედველობას და გამოძიება ჩაატარებს ყველა საჭირო საგამოძიებო მოქმედებას რაც ჩასატარებელია. ამ ეტაპზე ჩვენ გაგზავნილი გვაქვს სამართლებრივი დახმარების შესახებ შუამდგომლობები აზერბაიჯანში და ველოდებით ჩვენი აზერბაიჯანელი კოლეგების მიერ ამ შუამდგომლობის შესრულებას. პარალელურად, ჩვენ ვცდილობთ, რომ დავკითხოთ საქმეზე მუხთარლის აზერბაიჯანელი ადვოკატი", - განაცხადა ირაკლი შოთაძემ.
საგამოძიებო უწყების ხელმძღვანელის თქმით, მას არ მოუსმენია აზერბაიჯანელი ჟურნალისტის მეუღლის მიერ გაკეთებული განცხადება, რომლის თანახმადაც, საქმეში არსებობს ისეთი გარემოებები, რომლის საფუძველზეც შესაძლებელია საქართველოს შს მინისტრის პასუხისმგებლობის საკითხი დადგეს.
შოთაძის ამბობს, რომ მისთვის უცნობია, თუ რას ეფუძნება ლეილა მუსტაფაევას განცხადება.
ნინო ექვთიმიშვილი