ეკონომიკა

რომან კაკულია საქართველოში ლატვიის რესპუბლიკის საგანგებო და სრულუფლებიან ელჩს შეხვდა

პარლამენტის დარგობრივი ეკონომიკისა და ეკონომიკური პოლიტიკის კომიტეტის თავმჯდომარე, რომან კაკულია ლატვიის რესპუბლიკის საგანგებო და სრულუფლებიან ელჩს საქართველოში, იანის ზლამეცს შეხვდა. მხარეებმა საქართველოს ეკონომიკური პოლიტიკის ძირითად მიმართულებებზე, მთავრობის ეკონომიკურ პრიორიტეტებსა და მათი განხორციელების პერსპექტივებზე ისაუბრეს. რომან კაკულიამ და იანის ზლამეცმა განიხილეს საქართველოსა და ლატვიის რესპუბლიკას შორის მომავალი მრავალმხრივი თანამშრომლობის საკითხებიც.

პარლამენტის პრესსამსახურის ცნობით, შეხვედრაზე განხილული ერთერთი მთავარი საკითხი ურბანიზაციისა და ენერგოეფეტურობის სფეროები იყო, სადაც, ელჩის თქმით, ლატვიას კარგი გამოცდილება აქვს და მისი გაზიარება საქართველოსთვის მნიშვნელოვანი იქნება. მხარეები შეთანხმდნენ, რომ დარგობრივი ეკონომიკისა და ეკონომიკური პოლიტიკის კომიტეტის თავმჯდომარეს აღნიშნული მიმართულებების განვითარების კონცეფიის ამსახველ დოკუმენტაციას მიაწოდებენ. გარდა ამისა, საქართველოს ურბანიზაციისა და ენერგოეფექტურობის სფეროს კვალიფიციური ექსპერტები ეწვევიან, რომლებიც დარგობრივი ეკონომიკისა და ეკონომიკური პოლიტიკის კომიტეტსა და შესაბამის სტრუქტურებს ლატვიის გამოცდილებას გაუზიარებენ.

მხარეები შეთანხმდნენ, რომ გაკეთებული არჩევანის მოტივაციის შესწავლისა და გაანალიზების მიზნით, უახლოეს მომავალში შეხვედრა იმ ლატვიელ ინვესტორებთან გაიმართება, რომლებმაც ინვესტიციები საქართველოში უკვე განახორციელეს.

„ამ მოტივაციების გაანალიზება ჩვენ დაგვეხმარება სხვა პოტენციურ ინვესტორებთან საინვესტიციო პოლიტიკის განვითარებისთვის. ამასთან დაკავშირებით შევთანხმდით მრგვალი მაგიდის ორგანიზებაზე“,- განაცხადა შეხვედრის დასრულების შემდეგ რომან კაკულიამ.