საზოგადოება
საფინანსო კომპანია „საქართველოს“ მიერ დაზარალებული მეანაბრეები ეროვნული ბანკის წარმომადგენლებთან შეხვედრას ითხოვენ
საფინანსო კომპანია „საქართველოს“ მიერ დაზარალებული მეანაბრეები ეროვნულ ბანკთან აქციას მართავენ. ისინი ითხოვენ, ეროვნული ბანკის წარმომადგენლები შეხვდნენ, რათა მათი დახმარებით პრობლემის გადაჭრის გზა მოძებნონ.
მეანაბრეების ინფორმაციით, კიდევ ერთმა დაზარალებულმა სიცოცხლე თვითმკვლელობით დაასრულა.
აქციის ერთ-ერთმა მონაწილემ, უფლებადამცველმა მამუკა ტუსკაძემ შექმნილი ვითარება ეროვნული ბანკის მიერ გატარებულ არასწორ რეფორმებს დაუკავშირა.
„დღეს შევიკრიბეთ ეროვნული ბანკის წინ, რათა კიდევ ერთხელ გამოვხატოთ პროტესტი ეროვნული ბანკის მიერ ჩატარებულ ხისტ და არასწორ რეფორმასთან დაკავშირებით, რამაც შედეგად მოგვცა რამდენიმე გაკოტრებული კომპანია, თაღლითები ციხეში და ამავდროულად ათასობით დაზარალებული და ათობით გარდაცვლილი ადამიანი. მათ შორის, უმრავლესობამ თვითმკვლელობით დაასრულა სიცოცხლე. დღეს აქ იმიტომ შევიკრიბეთ, რომ კიდევ ერთხელ გავაგებინოთ ეროვნულ ბანკს ჩვენი ხმა. დაახლოებით ერთი თვის წინ პარლამენტში, როდესაც ეროვნული ბანკის პრეზიდენტს ანგარიშის წარდგენა ჰქონდა, ჩემ მიერ დასმულ კითხვაზე და შემდგომ კულისებში იყო საუბარი, რომ ეროვნული ბანკი გამოთქვამს მზადყოფნას ამ ხისტი პოლიტიკისგან მიღებული მძიმე შედეგების გამო. ისინი გარკვეულწილად იღებდნენ პასუხისმგებლობას ამ არასწორი რეფორმის გამო. დღეს აქ შევიკრიბეთ, რათა შევხვდეთ ეროვნული ბანკის ხელმძღვანელობას და მოვისმინოთ პასუხები“, -თქვა ტუსკაძემ.
მეანაბრეთა ნაწილი ეროვნული ბანკის შენობაში შევიდა ხელმძღვანელობასთან შეხვედრის მოთხოვნით. იმის გამო, რომ იქ შესვლას აქციის მონაწილეთა დიდი ნაწილი ცდილობდა, ხოლო დაცვის თანამშრომელმა მხოლოდ რამდენიმე მათგანს მისცეს ამის შესაძლებლობა, მეანაბრეებსა და პოლიციას შორის მცირე შელაპარაკება მოხდა.
ეროვნული ბანკიდან გამოსულ აქციის მონაწილეთა თქმით, მათ რამდენიმე წუთში გააგებინებენ, თუ ვის შეხვდებიან.
ანა მებურიშვილი