არქივი
მსოფლიო
საფრანგეთის მთავრობა „ყვითელი ჟილეტების“ მიმართ ზომებს გაამკაცრებს
საფრანგეთის პრემიერ-მინისტრმა ედუარ ფილიპმა განაცხადა, რომ ქვეყნის მთავრობა გეგმავს კანონის მიღებას, რომელიც „ყვითელი ჟილეტების“ მოძრაობის არასანქცირებული აქციების მონაწილეებისთვის პასუხისმგებლობის გამკაცრებას ითვალისწინებს.
ახალი კანონპროექტი აუკრძალავს ხულიგნებს საპროტესტო აქციებში მონაწილეობის მიღებას, ასევე დემონსტრანტებისთვის ნიღბების ტარებას.
გარდა ამისა, ბიზნესისა და კერძო საკუთრებისთვის მიყენებული ზიანის ანაზღაურება არეულობის მონაწილეებს დაეკისრებათ.
ფილიპის თქმით, საპროტესტო მოძრაობის მოსალოდნელი ახალი ტალღის დროს იქნება მობილიზებული სამართალდამცავი ორგანოების 80 000 თანამშრომელი.
წინა უქმეებზე პროტესტის მონაწილეებმა მთავრობის შენობის ჭიშკარი აიღეს, ასევე ისინი პოლიციას უპირისპირდებოდნენ და წვავდნენ მანქანებსა და მოტოციკლებს.
საპროტესტო აქციები საფრანგეთში 17 ნოემბერს დაიწყო. დემონსტრაციების დროს მომხდარ არეულობას 6 ადამიანის სიცოცხლე ემსხვერპლა, ხოლო დაახლოებით 1400 ადამიანი დაშავდა. თავდაპირველად დემონსტრანტები საწვავაზე გადასახადების დაგეგმილ ზრდას აპროტესტებდნენ. პროტესტის ნიშნად აქციის მონაწილეებმა ყვითელი ჟილეტები ჩაიცვეს, რომლის მანქანაში ტარება სავალდებულოა ყველა მძღოლისთვის.
4 დეკემბერს საფრანგეთის პრემიერ-მინისტრმა განაცხადა, რომ რეფორმა საწვავის ფასის ზრდაზე, რის გამოც რამდენიმე კვირის განმავლობაში საფრანგეთი არეულობამ და საპროტესტო ტალღამ მოიცვა, 6 თვით შეჩერდება.
ახლა აქციების მონაწილეები სხვა მოთხოვნებს აყენებენ, რომელთა შორისაც შედის: მაღალი ანაზღაურება, დაბალი გადასახადები, უკეთესი სოციალური დახმარებები, უნივერსიტეტებში მარტივად მოხვედრა და პრეზიდენტის გადადგომა.