სამართალი

სახალხო დამცველის ანგარიშში იუსტიციის უმაღლესი საბჭოს საქმიანობა საკმაოდ კრიტიკულადაა შეფასებული-ნაზი ჯანეზაშვილი

ადამიანის უფლებათა დაცვის 2017 წლის მდგომარეობის თაობაზე სახალხო დამცველის ანგარიში იყო განხილვის ერთ-ერთი საკითხი იუსტიციის უმაღლესი საბჭოს დღევანდელ სხდომაზე.

როგორც საბჭოს სხდომის დაწყებამდე წევრმა ნაზი ჯანეზაშვილმა განაცხადა, სახალხო დამცველის ანგარიშში იუსტიციის უმაღლესი საბჭოს საქმიანობა საკმაოდ კრიტიკულადაა შეფასებული.

„სახალხო დამცველის ანგარიში ჩემთვის არის მნიშვნელოვანი, ვინაიდან ვფიქრობ, რომ იმ ეროვნული ინსტიტუტის რეკომენდაციები, რომელიც ადამიანის უფლებებს იცავს, მაქსიმალურად უნდა იყოს გათვალისწინებული. ჩვენ ვიცით, რომ წარსულში არაერთი საჩივარი იყო წარმოდგენილი დისციპლინურ სამართალწარმოებასთან დაკავშირებით მოსამართლეების მიმართ, თუმცა ხშირ შემთხვევაში უმაღლესმა საბჭომ ეს საჩივრები არ გაითვალისწინა, მასში გამოთქმული შენიშვნები და რეკომენდაციები არ იქნა აღქმული შესაბამისად. ყურადღება გასამახვილებელია საკითხებზე, რომელიც ეხება იუსტიციის საბჭოს საქმიანობას. საკმაოდ კრიტიკულადაა შეფასებული საბჭოს საქმიანობა და იმედი მაქვს, რომ დღევანდელი ჩვენი მსჯელობა იქნება კონსტრუქციული. საბჭო თუ არ იქნება თვითკრიტიკული, ვერ იზრუნებს გაუმჯობესებაზე.“-განაცხადა ნაზი ჯანეზაშვილმა.

ნაზი ჯანეზაშვილი მიესალმება უზენაესი სასამართლოს თავმჯდომარის მზაობას, რომ ანგარიშში დასმულ საკითხებზე საბჭოს ფორმატში იმსჯელონ.

ცირა გურგენიძე