სამართალი

საკონსტიტუციო სასამართლოს შესახებ კანონთან დაკავშირებით კითხვები პრეზიდეტნსაც გააჩნია - ირინა იმერლიშვილი

უშიშროების საბჭოს მდივნის, ირინა იმერლიშვილის განცხადებით, საკონსტიტუციო სასამართლოს შესახებ ახალ კანონთან დაკავშირებით გადაწყვეტილებას პრეზიდენტი ვენეციის კომისიის დასკვნის შემდეგ მიიღებს.

ამის შესახებ იმერლიშვილმა თემის კომენტირებისას განაცხადა.

„ჩვენ დაველოდებით ამ დასკვნას. პრეზიდენტმა , როგორც იცით, კიდევ ერთხელ გამართა შეხვედრა არასამთავრობო ორგანიზაციებთან, გამართა შეხვედრა საკონსტიტუციო სასამართლოს თავმჯდომარესთან და უკვე იმის მიხედვით, თუ რა იქნება ვენეციის კომისიის დასკვნაში, იმ კითხვებთან დაკავშირებით რომელიც პრეზიდენტსაც გააჩნია, შემდეგ უკვე მიიღებს გადაწყვეტილებას“,-განაცხადა იმერლიშვილმა.

შეგახსენებთ, რომ საკონსტიტუციო სასამართლოს შესახებ ახალი კანონი პარლამენტმა მესამე მოსმენით მიიღო. ამის შემდეგ იგი პრეზიდენტს გადაეგზავნა.

გიორგი მარგველაშვილის ადმინისტრაციამ კანონი დასკვნისთვის ვენეციის კომისიას გადაუგზავნა, რადგან მისი თქმით, კანონის მიღების პროცესში არსებობდა გარკვეული ხარვეზები.

ვენეციის კომისიის დასკვნას თბილისში დღეს ელოდებიან, რის შემდეგ გაირკვევა დაამტკიცებს პრეზიდენტი ახალ დოკუმენტს თუ მას ვეტოს დაადებს. გიორგი მარგველაშვილს პროცედურისთვის ვადა 3 ივნისამდე აქვს.

მონიკა დავლიანიძე