საზოგადოება

საყოველთაო ჯანდაცვის პროგრამას 10 კლინიკა გამოეთიშება

საყოველთაო ჯანდაცვის პროგრამას, წინასწარი მონაცემებით, 10 კლინიკა გამოეთიშება.

ამის შესახებ ჯანდაცვის, შრომისა და სოციალური დაცვის მინისტრმა დავით სერგეენკომ, წამყვანი კლინიკების ხელმძღვანელებთან შეხვედრაზე განაცხადა, რომლებსაც მინისტრმა, ჯანდაცვის სფეროში რეფორმების მეორე ტალღის შესახებ ინფორმაცია მიაწოდა.

მინისტრის თქმით, ახალი რეფორმის ძირითადი მიმართულებები თებერვლიდან განხორციელდება, დანარჩენი კი ეტაპობრივად მთელი წლის განმავლობაში.

"სამი მთავარი საყრდენი არის ფასი, ხელმისაწვდომობა და ხარისხი. პირველ ეტაპზე ძალიან წარმატებით შესრულდა, და ეს მოხდა ერთ ფაქტორზე ზემოქმედებით - ხელმისაწვდომობაზე. თუ დანარჩენ ორზე - ხარისხსა და ფასზე არ ვიმოქმედებთ რეფორმა აღმოჩნდება ცალმხრივი. ეს ყველაზე რთულად გასატარებელი რეფორმაა. ერთ წელზე მეტი დასჭირდა მის მომზადებას. დღეს უკვე მზად ვართ კლინიკების მმართველებს გავაცნოთ მეორე ტალღის რეფორმის ძირითადი მიმართულებები, წინასწარი მონაცემებით, მაქსიმუმ 10 კლინიკა იქნება, მცირე კალიბრის კლინიკები", - განაცხადა დავით სერგეენკომ.

მისივე განცხადებით, მონაცემები კლინიკებთან დაკავშირებით საჯარო იქნება იმ შემთხვევაში თუ მათ თავად ექნებათ სურვილი.

მონიკა დავლიანიძე