პოლიტიკა
სამწუხაროდ, ჩვენ უნდა დავადასტუროთ გარდაცვალების ორი ფაქტი - გიორგი გახარია
შინაგან საქმეთა მინისტრმა გიორგი გახარიამ დაადასტურა ორი ახალგაზრდის გარდაცვალების ფაქტი. მისი თქმით, გამოძიება ნარკოტიკული ინტოქსიკაციის ვერსიაზეც მუშაობს.
„სამწუხაროდ, ჩვენ უნდა დავადასტუროთ გარდაცვალების ორი ფაქტი. რა თქმა უნდა, გამოძიების საქმეა, ზუსტად დადგინდეს , რა ვითარებაში და რის გამო დადგა ეს ფაქტი. შესაბამისად, გამოძიება მიმდინარეობს. მიმდინარეობს ისეთ ფორმატში, რომ ის განიხილავს ყველა ვერსიას და შესაბამისად, ჩვენ მაქსიმალურად გავაკეთებთ ყველაფერს, რომ რაც შეიძლება სწრაფად დადგეს შედეგი. კიდევ ერთხელ მინდა ხაზგასმით აღვნიშნო, რომ ჩვენ არ შემოვიფარგლებით ერთი რომელიმე ვერსიით. ჩვენ გვაქვს სამწუხარო, ტრაგიკული ფაქტი, რომელსაც სრულად მოვფენთ ნათელს უახლოეს პერიოდში", - თქვა გახარიამ.
მინისტრის თქმით, არსებობს საიტი, რომლის მეშვეობით ნარკოტიკული საშუალების ონლაინშეძენა ხდება. გახარიამ განაცხადა, რომ საიტი დაბლოკილია, თუმცა სხვადასხვა ხერხის საშუალებით მაინც ხერხდება იქ შესვლა.
„ერთმნიშვნელოვნად მინდა აღვნიშნო, რომ მსგავსი საიტი არსებობს. მეორე, ამ საიტთან დაკავშირებით ჩვენ კომუნიკაციის მარეგულირებელთან ერთად უკვე ვიმუშავეთ და ეს საიტი დავბლოკეთ. თუმცა, მოგეხსენებათ, რომ თანამედროვე ტექნოლოგიების პირობებში არსებობს სხვადასხვა გზა, გვერდის ავლით იგივე საიტზე მოხვედრის. ჩვენ ამ პროცესში ვართ დღესაც. იმ ელექტრონული სივრცის, სადაც მსგავსი დანაშაული ხდება, სრულად გაკონტროლება სამწუხაროდ, დღევანდელი ტექნოლოგიების დონეზე შეუძლებელია. თუმცა, მიუხედავად ამისა ჩვენ ყოველთვის, როდესაც ასეთი ინფორმაცია გადის, სწრაფი რეაგირება გვაქვს, ისევე, როგორც ამ საიტთან დაკავშირებით. მინდა, მოგახსენოთ, რომ მარეგულირებელ კომისიასთან ერთად ჩვენ ერთხელ უკვე დავბლოკეთ ეს საიტი. ამ საიტის ძირითადი კომპონენტი დაბლოკილია, თუმცა ხდება გვერდის ავლით, სხვადასხვა საშუალებებით ამ საიტზე მოხვედრა", - განაცხადა გახარიამ.
ცნობისთვის, ბოლო დღეები მედიაში ვრცელდება ინფორმაცია, რომ თბილისში ახალი ნარკოტიკი, „აბაზანის მარილი“, იგივე მეფედრონი გავრცელდა..
გუშინ მედიანიუსს შსს-ში დაუდასტურეს 21 წლის ქალის გარდაცვალების ფაქტი, თუმცა, უკავშირდება ეს თუ არა ნარკოტიკულ ინტოქსიკაციას, ექსპერტიზა დაადგენს.