საზოგადოება

სერბეთის პატრიარქს არ მიუღია ბიბილოვი ოფიციალურად, ფაქტობრივად შემთხვევითი შეხვედრით შემოიფარგლა - მამა კახაბერ გოგოტიშვილი

საქართველოს საპატრიარქომ სერბეთის საპატრიარქოს წერილი გაუგზავნა სამხრეთ ოსეთის დე-ფაქტო პრეზიდენტის, ანატოლი ბიბილოვის ვიზიტთან დაკავშირებით. ოფიციალური პასუხი საპატრიარქოს ამ დრომდე არ მიუღია.

მიუხედავად ამისა, სერბეთის საპატრიარქომ საბერძნეთში საქართველოს ელჩის მეშვეობით უპასუხა საქართველოს საპატრიარქოს, რომ ვიზიტი არაოფიციალური იყო და შემთხვევით ხასიათს ატარებდა.

როგორც საპატრიარქოს საგარეო საქმეთა განყოფილების თავმჯდომარის მოადგილემ მამა კახაბერ გოგოტიშვილმა „რუსთავი 2“-ს განუცხადა, ამაზე უფრო დეტალურად ისაუბრებენ სერბეთის ეროვნული ასამბლეის თავჯდომარესთან, მაია გოიკოვიჩთან, რომელიც საპატრიარქოს ეწვევა. შეხვედრის ერთ-ერთი განსახილველი თემა სწორედ ბიბილოვისა და სამხრეთ ოსეთის დელეგაციის სერბეთში ვიზიტი იქნება.

„ჩვენ ყველა შემთხვევაში გვექნება ამ თემაზე საუბარი, რატომ ჩავიდა და როგორ ჩავიდა, მაგრამ რა საუბარი იქნება, ალბათ, შეხვედრის შემდეგ აჯობებს, ამაზე რომ ვილაპარაკოთ. საქართველოს ეკლესიას ოფიციალური წერილი ჯერ არ მიუღია სერბეთის ეკლესიისგან, მაგრამ მიიღო პასუხი ჩვენი ელჩის საშუალებით და ასევე ოფიციალური წერილიც მიიღო მან ამის შესახებ, რომ ეს არ იყო ოფიციალური ვიზიტი სერბეთის რესპუბლიკაში და სერბეთის პატრიარქს არ მიუღია ბიბილოვი ოფიციალურად. ფაქტობრივად შემთხვევითი შეხვედრით, შეიძლება ასე ითქვას, შემოიფარგლა,“- განაცხადა მამა კახაბერ გოგოტიშვილმა.

სამხრეთ ოსეთის დე-ფაქტო რესპუბლიკის პრეზიდენტი ანატოლი ბიბილოვი სერბეთის მართლმადიდებელი ეკლესიის პატრიარქ ირინეოს 12 იანვარს შეხვდა. შეხვედრა სერბეთის პატრიარქის რეზიდენციაში შედგა.