მოზაიკა

თბილისი ლეგენდარული ალ ბანოს პირველ სოლო კონცერტს უმასპინძლებს

24 ნოემბერს თბილისის დიდ საკონცერტო დარბაზში ლეგენდარული იტალიელი მომღერლის, ალ ბანოს პირველი სოლო კონცერტი გაიმართება. მუსიკოსი საქართველოს საქველმოქმედო ფონდ "ცხოვრება მშვენიერიას" მოწვევით სტუმრობს.

როგორც მომღერალმა სასტუმრო "ფაინ ასტორიაში" გამართულ პრესკონფერენციაზე განაცხადა, იგი ქართველ მსმენელთან შეხვედრას მოუთმენლად ელოდება.

"შევასრულებ ყველა ჰიტს, რომელიც ასე ძალიან გიყვართ. საქართველო საოცარი ქვეყანაა და მიხარია, რომ აქ ვარ", - აღნიშნა ალ ბანომ.

მისივე თქმით, 6-7 წლიდან მღერის და, ფუტკრის მსგავსად, ენერგიასაც აქედან იღებს. როგორც მომღერალმა " მედიანიუსის" კითხვის პასუხად აღნიშნა, საქართველოში ადგილობრივი სიმღერები უკვე მოისმინა და ძალიან მოიხიბლა.

"თქვენმა მუსიკამ სარდინიის მუსიკა გამახსენა. როცა მას კარგად ჩავუღრმავდები, ქართული სიმღერები ჩემი საყვარელი უცხოენოვანი სიმღერების კოლექციაში თავის ადგილსაც დაიმკვიდრებს", - თქვა ალ ბანომ.

როგორც "ცხოვრება მშვენიერიას" დამფუძნებელმა და გენერალურმა დირექტორმა ნიკოლოზ ესაკიამ განაცხადა, ალ ბანოს მუსიკას დღესაც ისევე აქტიურად და ინტერესით უსმენენ, როგორც 50-55 წლის წინ. მის ლეგენდარულობასაც სწორედ ეს გარემოება განაპირობებს. კონცერტი საქველმოქმედო იქნება და შემოსული თანხის დიდი ნაწილი "ფერადი ქალაქის - აუტიზმის ეროვნული ცენტრის" მშენებლობას მოხმარდება.

აღსანიშნავია, რომ გასულ წელს ამავე ფონდის ორგანიზებით თბილისში იტალიური ჯგუფის - "რიკი ე პოვერის" - საქველმოქმედო კონცერტი გაიმართა, საიდანაც შემოსული თანხა ონკოლოგიური დაავადებების მქონე ბავშვებს ჩაერიცხა.

საქველმოქმედო ფონდი "ცხოვრება მშვენიერია" 2014 წელს შეიქმნა და დღემდე უამრავ ადამიანს დაეხმარა.

ალ ბანო ქართველი მაყურებლის წინაშე ფონდის 10 წლის იუბილესთან დაკავშირებით წარდგება. 25 ნოემბერს კი მის კონცერტს რესტორანი "ქვევრი" უმასპინძლებს.