სამართალი
ტელეკომპანია ,,იბერიას“ საქმეზე სასამართლო პროცესი დაცვის მხარის მოწმეთა გამოუცხადებლობის გამო კვლავ გადაიდო
თბილისის საქალაქო სასამართლოში ტელეკომპანია ,,იბერიას“ სამაუწყებლო ლიცენზიის იძულებით ჩამორთმევის საქმეზე პროცესი დაცვის მხარის მოწმეთა გამოუცხადებლობის გამო კიდევ ერთხელ გადაიღო.
როგორც დაცვის მხარის წარმომადგენლებმა განმარტეს, სხდომაზე მოწმის სტატუსით კობა კვანტალიანი, გრიგოლ გიორგაძე და ქიბარ ხალვაში უნდა დაეკითხათ, თუმცა არცერთი მათგანი დღეს სასამართლოს წინაშე არ გამოცხადებულა.
კერძოდ, როგორც ბრალდებულმა გიორგი ლაცაბიძემ აღნიშნა, კობა კვანტალიანმა მის ადვოკატს დღეს დილით გამოუგზავნა ელექტრონულ ფოსტაზე შეტყობინება და სასამართლოზე გამოუცხადებლობის მიზეზად ბავშვის ექიმთან წაყვანა დაასახელა.
რაც შეეხება დევნილთა მინისტრის მოადგილეს, გრიგოლ გიორგაძეს, ლაცაბიძის თქმით, მას დაცვის მხარის მიერ მოპოვებულ ორ მისამართზე გაეგზავნა უწყება. როგორც ბრალდებულმა განმარტა, გამოძიების მიერ გამოკითხვის ოქმში მითითებული საცხოვრებელი მისამართი საქართველოს ფოსტამ არასწორად მიიჩნია. მეორე მისამართი კი, როგორც აღინიშნა, დაცვის მხარემ გიორგაძის ქონებრივი დეკლარაციიდან მოიპოვა, თუმცა არც აღნიშნულ მისამართზე მოხდა უწყების ჩაბარება.
დასაკითხ მოწმეთაგან კიდევ ერთის, ქიბარ ხალვაშის შემთხვევაში კი, დაცვის მხარემ განმარტა, რომ ბიზნესმენის ზუსტი მისამართები, როგორც გერმანიაში, ისე საქართველოში, მათთვის უცნობია და შესაბამისად, კონკრეტული მისამართის გარეშე უწყების გაგზავნა ვერ მოხერხდა.
აღსანიშნავია, რომ დაცვის მხარის მიერ დასაკითხ მოწმეთა სიაშია იოსებ მგელაძეც, რომლის სასამართლოში გამოცხადებაც ასევე, გასული რამდენიმე სხდომის მანძილზე ვერ უზრუნველყო დაცვის მხარემ.
მოწმეთა გამოუცხადებლობის პრობლემის გადასაჭრელად, ბრალდებულ ზურაბ ადეიშვილის ადვოკატმა, შოთა კახიძემ დააყენა შუამდგომლობა, რომ მომდევნო სხდომა სექტემბრისთვის ჩაინიშნოს. მისი თქმით, ზაფხულის პერიოდში შესაძლოა, დასაკითხი მოწმეები თბილისში არ იმყოფებოდნენ და მათი სასამართლოში გამოცხადება სწორედ ამ ფაქტორის გამო შეფერხდეს.
აღნიშნულ შუამდგომლობას არ დაეთანხა საქმის პროკურორი, ემზარ გაგნიძე და აღნიშნა, რომ ეს მესამე შემთხვევაა, როდესაც დაცვის მხარემ ვერ უზრუნველყო მოწმეთა გამოცხადება. მისი შეფასებით, ადგილი აქვს პროცესის გაჭიანურებას.
,,არ უნდა გადაიდოს სექტემბრამდე. ან უნდა გამოაქვეყნონ საქმეში არსებული ამ მოწმეების ჩვენები, ან უზრუნველყონ შემდეგ სხდომაზე მოწმეთა გამოცხადება“, - აღნიშნა ემზარ გაგნიძემ.
მოსამართლე ალექსანდრე იაშვილმა არ დააკმაყოფილა შუამდგომლობა პროცესის სექტემბრამდე გადადების თაობაზე და მოუწოდა დაცვის მხარეს გამოიყენოს გონივრული ძალისხმევა და მომდევნო პროცესისთვის მოწმეთა გამოცხადება უზრუნველყონ.
საბოლოოდ, მოსამართლემ პროცესი 31 ივლისის 14:30 საათისთვის გადადო.
შეგახსენებთ, რომ პროკურატურამ ტელეკომპანია ,,იბერიას’’ დახურვისა და სამაუწყებლო ლიცენზიის ჩამორთმევის საქმე 2016 წლის თებერვალში გახსნა. აღნიშნულ ფაქტთან დაკავშირებით ყოფილი გენერალური პროკურორი ზურაბ ადეიშვილი და მისი პირველი მოადგილე გიორგი ლაცაბიძე სისხლის სამართლის პასუხისგებაში მიეცნენ.