სამართალი

ვინ თუ არა გიორგი მამალაძემ შესანიშნავად იცის, რომ დამნაშავეა - პროკურორი

მას შემდეგ, რაც გავეცნობით სამოტივაციო ნაწილს, მივიღებთ გადაწყვეტილებას გავასაჩივრებთ თუ არა სააპელაციო სასამართლოს გადაწყვეტილებას, - განუცხადა ჟურნალისტებს ე.წ. ციანიდის საქმის პროკურორმა, ზვიად გუბელაძემ საქმეზე მეორე ინსტანციის სასამართლოს გადაწყვეტილების გამოცხადების შემდეგ.

მისი განმარტებით, პროკურატურა სააპელაციო სასამართლოსგან მოითხოვდა, რომ დეკანოზ გიორგი მამალაძეს საქალაქო სასამართლოს მიერ გამოტანილი გამამატყუნებელი განაჩენი - შურისძიების მოტივით განზრახ მკვლელობის მომზადება, შეცვლილიყო - ანგარებით მკვლელობის მომზადებით, თუმცა სააპელაციო სასამართლომ უცვლელი დატოვა საქალაქო სასამართლოს გადაწყვეტილება.

„სააპელაციო სასამართლომ გიორგი მამალაძე დამნაშავედ სცნო განზრახ მკვლელობის მომზადების ნაწილში, ასევე ცეცხლსასროლი იარაღის მართლსაწინააღმდეგო შეძენა-შენახვაში. ჩვენ ველოდით აღნიშნულ გადაწყვეტილებას. რაც შეეხება ჩვენს მოთხოვნებს ანგარებასთან დაკავშირებით, გავეცნობით სამოტივაციო ნაწილს და შემდეგ მივიღებთ გადაწყვეტილებას. ვინ თუ არა გიორგი მამალაძემ შესანიშნავად იცის, რომ დამნაშავეა და ის განაჩენის გამოცხადებაზეც კი არ მოვიდა“, - განაცხადა გუბელაძემ.