მსოფლიო

ვლადიმერ ზელენსკი უკრაინის პრეზიდენტის მოვალეობის შესრულებას შეუდგა

ვლადიმერ ზელენსკი უკრაინის პრეზიდენტის მოვალეობის შესრულებას შეუდგა. რადას სხდომათა დარბაზში ქვეყნის რიგით მეექვსე პრეზიდენტმა სახარებაზე ფიცი დადო, რის შემდეგაც მას უკრაინის პრეზიდენტის სიმბოლიკა - გერბიანი ბეჭედი, ჯაჭვი და მოწმობა გადასცეს.

ფიცის დადების შემდეგ, ვლადიმერ ზელენსკი სიტყვით გამოვიდა და მთავარ ამოცანად დონბასში ცეცხლის შეწყვეტა დაასახელა. მისი განცხადებით, რუსეთთან დიალოგი მხოლოდ უკრაინელი ტყვეების გათავისუფლებით დაიწყება.

მან უკრაინის რადას უახლოეს მომავალში სადეპუტატო იმუნიტეტის მოხსნასა და უკანონო გამდიდრებაზე სისხლის სამართლის პასუხისმგბელობის დაკისრების შესახებ კანონების მიღება მოსთხოვა. ასევე, უშიშროების საბჭოს, გენპროკურორისადა თავდაცვის მინისტრების მოხსნისკენაც მოუწოდა.

უმაღლეს რადაში უკრაინის პრეზიდენტის ინაუგურაციის ცერემონიას დაესწრო საქართველოს პრეზიდენტი სალომე ზურაბიშვილი. ასევე უნგრეთისა და ბალტიის ქვეყნების პრეზიდენტები. გარდა ამისა, რადას სხდომათა დარბაზში ხუთი ქვეყნის პრეზიდენტთან ერთად იმყოფებოდნენ უკრაინის ყოფილი პრეზიდენტები: ლეონიდ კრავჩუკი, ვიქტორ იუშჩენკო და პეტრო პოროშენკო.