პოლიტიკა

მივმართავ პოლიტიკურ პარტიებსა და არასამთავრობოებს, თავი შეიკავონ სპეკულაციებისგან - ახალგორის გამგებელი

ახალგორის გამგებელმა ნუგზარ თინიკაშვილმა მოუწოდა პოლიტიკურ პარტიებსა და არასამთავრობო ორგანიზაციებს, თავი შეიკავონ სპეკულაციებისგან არჩილ ტატუნაშვილის საკითხზე.

„უფრო ინტენსიური მუშაობა და მოლაპარაკებები მიმდინარეობს მიცვალებულის არჩილ ტატუნაშვილის გადმოცემისათვის და ამავე დროს მინდა ვისარგებლო შემთხვევით და მივმართო პოლიტიკურ პარტიებს, საზოგადოებრივ ორგანიზაციებს ძალიან დიდი თხოვნით, როგორც ოჯახის სახელით, ისე მთელი საზოგადოებისა და ახალგორის მუნიციპალიტეტის სახელით-თავი შევიკავოთ ყოველგვარი სპეკულაციებისაგან და ამ მძიმე ვითარების პოლიტიკური ქულების ჩაწერისაგან. არ არის ახლა ის დრო, რომ ჩვენ სიტუაცია დავძაბოთ და სიტუაციის დაძაბვით მხოლოდ და მხოლოდ ჩვენი მტრის, ჩვენი არჩილ ტატუნაშვილის მკვლელების წისქვილზე დავასხათ წყალი“, -თქვა ახალგორის გამგებელმა.

22 თებერვალს საოკუპაციო ძალებმა საქართველოს სამი მოქალაქე: არჩილ ტატუნაშვილი, ლევან ქუტაშვილი და იოსებ პავლიაშვილი ახალგორში დააკავა. მომდევნო დღეს ოსურმა მედიამ გაავრცელა ინფორმაცია ტატუნაშვილის სიკვდილის შესახებ. საოკუპაციო ძალები ცხედრის გადაცემაზე უარს ამბობენ. ტატუნაშვილის ოჯახმა კი შს მინისტრს, გიორგი გახარიას 48 საათი მისცეს ცხედრის თბილისის მიერ კონტროლირებად ტერიტორიაზე გადმოსასვენებლად.

ანა მებურიშვილი