პოლიტიკა

ვლადიმერ პუტინის მხარდამჭერი მომღერალი დიმა ბილანი თბილისშია

ოკუპანტი ქვეყნის პრეზიდენტის, ვლადიმერ პუტინის მხარდამჭერი მომღერალი დიმა ბილანი გუშინ ბათუმში კორპორატიულ საღამოზე იმღერა, დღეს კი ის უკვე თბილისს სტუმრობს.

როგორც ბილანმა ტვ იბერიას განუცხადა, ის პოლიტიკისგან შორსაა და ამაზე დასმულ კითხვებს გაუმართლებელს უწოდებს.

„მე არ ვარ ჩართული პოლიტიკაში, შესაბამისად პოლიტიკურ განცხადებებს ვერ გავაკეთებ. გაუმართლებელია, მუსიკოსს დაუსვათ კითხვები, რომელიც პოლიტიკას ეხება. ძალიან დიდი სურვილი მაქვს, აქ რამდენიმე კონცერტი ჩავატარო. ბათუმში კერძო ღონისძიებაზე ვიყავი მოწვეული, ერთ-ერთმა კოსმეტიკურმა კომპანიამ მომიწვია, აქ ხელისუფლების მოწვევით არ ჩამოვსულვარ“, - თქვა რუსმა შემსრულებელმა.

„ბათუმელების“ ინფორმაციით, რუსი მომღერალი შპს „ჯონსონ ენდ ჯონსონმა“ მოიწვია.

სავარაუდოდ, ბილანი საქართველოს დღესვე დატოვებს.

ბილანი ცნობილია თავისი მხარდაჭერით რუსეთის პრეზიდენტის, ვლადიმერ პუტინის მიმართ. 7 მარტს გავრცელდა პუტინის მხარდამჭერი კლიპი „გზამკვლევი ვარსკვლავი“, რომელშიც მონაწილეობა მიიღო ბილანმა. რუსეთის საპრეზიდენტო არჩევნებთან დაკავშირებულ ვიდეოში ასევე ა-სტუდიოს ქართველი სოლისტი ქეთა თოფურია მღერის.