მსოფლიო

20 000 მშვიდობისმყოფელი დონბასში - ვაშინგტონი აპირებს, რუსეთს უკრაინის კონფლიქტის დაძლევის გეგმა შესთავაზოს

„უახლოეს დღეებში“ აშშ-ის მთავრობა აპირებს, რუსეთს გეგმა შესთავაზოს დონბასში 20 000 უცხოელი მშვიდობისმყოფელის განლაგებასთან დაკავშირებით. ამაზე ვაშინგტონის დიპლომატიურ წყაროებზე დაყრდნობით The Wall Street Journal-ი წერს. კონკრეტულად სად და რა პირობებით იქნებიან განლაგებული მშვიდობისმყოფელები, გამოცემა არ აკონკრეტებს.

გარდა ამისა The Wall Street Journal-ის ინფორმაციით, ტრამპის ადმინისტრაციამ სავარაუდოდ დააკმაყოფილა უკრაინისთვის ლეტალური იარაღის, მათ შორის ტანკსაწინააღმდეგო კომპლექს Javelin-ის მიწოდების მოთხოვნა, თუმცა შეთანხმებული არაა, როდის მიაწოდებენ ამ ტექნიკას კიევს. თვითონ ვაშინგტონი ამას უარყოფს.

რუსეთის აგრესიასთან საბრძოლველად უკრაინისთვის ტანკსაწინაარმდეგო კომპლექსის მიწოდების რეკომენდაციით თეთრ სახლს პენტაგონმა მიმართა.

შეგახსენებთ, სექტემბერში უკრაინის პრეზიდენტმა პეტრო პოროშენკომ განაცხადა, რომ გაეროს სამშვიდობო მისიის განთავსება დონბასში შეაფერხებს ბოევიკებისთვის ახალი საბრძოლო რაზმებისა და იარაღის მიწოდებას.

ანა მებურიშვილი