მსოფლიო

2017 წელს ჩრდილოეთ კორეამ სანქციების გვერდის ავლით 200 მილიონი აშშ დოლარი გამოიმუშავა

2017 წელს ჩრდილოეთ კორეამ მასზე დაკისრებული შეზღუდვების გვერდის ავლით ექსპორტით 200 მილიონი აშშ დოლარი გამოიმუშავა. ამის შესახებ წერია გაეროს უშიშროების საბჭოს ანგარიშში.

მოხსენებაში ნათქვამია, რომ 2012-დან 2017 წლამდე ჩრდილოეთ კორეამ სირიის სახელმწიფო სამეცნიერო კვლევით ცენტრს 40-ზე მეტი ტვირთი გაუგზავნა. დოკუმენტში წერია, რომ ტვირთში ინახებოდა ფილა, რომელიც არ ექვემდებარება მჟავის ზემოქმედებას - სავარაუდოდ, მას გამოიყენებდნენ ქიმიური საწარმოს ასაშენებლად.

ანგარიშის მიხედვით, ჩრდილოეთ კორეამ მიანმარი ბალისტიკური რაკეტებით მოამარაგა.

გარდა ამისა გასულ წელს ჩრდილოეთ კორეამ ქვანახშირი გადააგზავნა რუსეთის, ჩინეთის, მალაიზიის, სამხრეთ კორეისა და ვიეტნამის ნავსადგურებში. ჩრდილოეთ კორეამ ტვირთის გადასაზიდად გააყალბა სავაჭრო დოკუმენტაცია.

გაეროს უშიშროების საბჭოს არაერთხელ გაუმკაცრებია სანქციები ჩრდილოეთ კორეის მიმართ ბირთვული პროგრამის განვითარებისა და სარაკეტო წვრთნების ჩატარების გამო.