ეკონომიკა

2017 წლის სექტემბერში მშპ-ის რეალურმა ზრდამ 5% შეადგინა - საქსტატის წინასწარი მონაცემები

საქართველოს სტატისტიკის ეროვნული სამსახურის წინასწარი მონაცემებით, 2017 წლის სექტემბერში წინა წლის შესაბამის პერიოდთან შედარებით მთლიანი შიდა პროდუქტის რეალურმა ზრდამ 5.0% შეადგინა. სულ მიმდინარე წლის 9 თვის საშუალო რეალურმა ზრდამ 4.7% შეადგინა.

2017 წელს სექტემბერში საქართველოში რეგისტრირებულ საწარმოთა ბრუნვა გასული წლის იმავე პერიოდთან შედარებით 18%-ით არის გაზრდილი.

მიმდინარე წლის სექტემბერში მშპ-ის მნიშვნელოვანი რეალური ზრდა დაფიქსირდა დამამუშავებელ მრეწველობაში, მშენებლობაში, ვაჭრობაში; ელექტროენერგიის, აირისა და წყლის წარმოებასა და განაწილებაში, ასევე სასტუმროებისა და რესტორნების სფეროში.

2017 წლის სექტემბრის ეკონომიკური ზრდა მნიშვნელოვანწილად განაპირობა საგარეო ვაჭრობის გაუმჯობესებულმა მონაცემებმა. კერძოდ, გაიზარდა პროდუქციის ექსპორტი შემდეგ სექტორებში:
ფეროშენადნობის ექსპორტი 207%-ით,
ღვინის ექსპორტი 90%-ით,
სპირტიანი სასმელების ექსპორტი 41%-ით,
მინერალური და მტკნარი წყლების ექსპორტი 55%-ით,
აზოტოვანი სასუქების ექსპორტი 149%-ით.

2017 წლის 9 თვეში საქართველოდან განხორციელებული საქონლის ექსპორტი 28.3%-ით გაიზარდა და 1 940.8 მლნ. აშშ დოლარი შეადგინა. მასზე გაზრდილი მოთხოვნა დაკავშირებულია ჩვენი სავაჭრო პარტნიორების საგარეო მოთხოვნების ზრდასთან და გაუმჯობესებუულ ეკონომიკურ მდგომარეობასთან.

გარდა ამისა, ეკონომიკურ ზრდაზე იმოქმედა საერთაშორისო ტურიზმიდან მიღებულმა შემოსავლებმა, რომლებიც 25.2%-ით გაიზარდა და 304.1 მლნ. აშშ დოლარი შეადგინა, რაც იმას ნიშნავს, რომ მომსახურების ექსპორტში არსებული დადებითი ტენდენცია სექტემბერშიც გაგრძელდა.

24.2%-ით გაიზარდა ფულადი გზავნილების მაჩვენებელი და 124.4 მლნ. აშშ დოლარი შეადგინა. ფულადი გზავნილები შიდა მოთხოვნის ერთ-ერთი მნიშვნელოვანი კომპონენტია, შესაბამისად მისი ზრდა დადებითად აისახება ეკონომიკურ ზრდაზე.