პოლიტიკა

აბესაძის დაკავება იმაზე მიუთითებს, რომ გარკვეულ სისტემურ პრობლემასთან გვაქვს საქმე - გულიკო ზუმბაძე

თბილისის საკრებულოს ადამიანის უფლებათა დაცვის კომისიის თავმჯდომარე, გულიკო ზუმბაძე ოთარ აბესაძის დაკავების ფაქტს გამოეხმაურა. მისი თქმით, დროდადრო მერიაში კორუფციის შემთხვევები მიუთითებს სისტემურ პრობლემაზე.

ზუმბაძე დარწმუნებულია, რომ თბილისის მერი არაა გახვეული რამე კორუფციულ საქმინობაში.

„სამწუხაროდ, ეს [აბესაძის დაკავება] არ არის პირველი შემთხვევა, რაც მიუთითებს, რომ გარკვეულ სისტემურ პრობლემასთან გვაქვს საქმე. მე შორს ვარ იმ აზრისგან, რომ თბილისის მერი გახვეულია ამგვარ საქმიანობაში, მე ამის მჯერა, მაგრამ როგორც ჩანს, მერს სჭირდება კიდევ უფრო მეტი პრინციპულობა და გადაწყვეტილების მიღების უფრო მტკიცე ნება.

ამ ყველაფერს თავისთავად დაკრავს პოლიტიკური ელფერი, წინასაარჩევნო პერიოდია და ეს მდგომარეობა შეიძლება გამოიყენოს როგორც მმართველმა პოლიტიკურმა ძალამ, ისე ოპოზიციამ. მმართველმა ძალამ იმ მიმართულებით, რომ მოვიდეს იმ პოზიციით, რომ კორუფცია არ იქნება და ოპოზიციას შეუძლია თავის სასარგებლოდ გამოიყენოს ეს სიტუაცია. მე ვფიქრობ, სასამართლოს დასრულებამდე არაფერი უნდა ვთქვათ“, - განაცხადა ზუმბაძემ დღევანდელ პრესკონფერენციაზე.

ზუმბაძემ აღნიშნა, რომ აბესაძეს სახელითა და გვარით იცნობდა და პირადი შეხება არ ჰქონია.