საზოგადოება

ჭუბერში მდინარის დონის მომატებამ რამდენიმე გზის მონაკვეთის ჩამოშლა გამოიწვია

სვანეთში, ჭუბერში გუშინ მოსულმა უხვმა ნალექმა მდინარის დონის მომატება გამოიწვია, რის შედეგად შემოვლითი გზა, რომლითაც მოქალაქეები მდინარის ერთი ნაპირიდან მეორეზე გადადიოდნენ, ჩამოიშალა.

მდინარის წყლის დონის მომატებამ ასევე რამდენიმე მონაკვეთის, მათ შორის, გზის საავტომობილო მონაკვეთების ჩამოშლა გამოიწვია.

ამ დროისთვის კიდევ ერთ საცხოვრებელ სახლს ემუქრება ჩამონგრევის საფრთხე. თუმცა სამაშველო სამსახურები აქტიურად მუშაობენ, რომ აღნიშნულ საცხოვრებელ სახლში წყალმა შეღწევა ვერ შეძლოს.

მოსახლეობის უმეტესი ნაწილი ევაკუირებულია.

სინოპტიკოსების ცნობით, 7 ივლისს, დღის პირველ ნახევრამდე მოსალოდნელია საშუალო ინტენსივობის ნალექი, რომელიც 8-9 ივლისს შესუსტდება.

გარემოს ეროვნული სააგენტოს ინფორმაციით, ჭუბერში მასშტაბური სტიქიის გამეორება გამორიცხულია.

ცნობისთვის, ხუთშაბათს უხვი ნალექის გამო მთის დიდი ნაწილი ჩამოიშალა, რასაც მოჰყვა მდინარე ნენსკრას ადიდება. დატბორილია მიმდებარე ტერიტორია. სოფელი ჭუბერი და კიდევ რამდენიმე დასახლება გარესამყაროსაა მოწყვეტილი. ჩამოწოლილმა მეწყერმა და მოვარდნილმა ღვარცოფმა სოფლებთან დამაკავშირებელი ხიდები და რამდენიმე სახლი წაიღო.