კომენტარი
ჩვენ მიწის ნაკვეთებს არ ვითხოვთ, თუ მასზე ეკლესიის მშენებლობა არ არის გამიზნული - მიქაელ ბოტკოველი
საქართელოს საპატრიარქოს მდივნის მამა მიქაელ ბოტკოველის თქმით, არასამთავრობო ორგანიზაცია“საერთაშორისო გამჭვირვალობა-საქართველოს“ მიერ გამოქვეყნებული ანგარიში არის ხელოვნურად აჟიტირებული, რადგან, ბოტკოველის თქმით, ვიღაცის ინტერესშია, რომ ეკლესიას ქონება არ გადაეცეს.
არასამათავრობო ორგანიზაციამ თბილისის მე-5 მოწვევის საკრებულოს სამწლიანი საქმიანობა შეაჯამა, სადაც საუბარი ეკლესიისთვის გადაცემულ მიწის ფართობებზეც არის. ანგარიშის მიხედვით, თბილისის მერიამ ეკლესიას საერთო ჯამში 183,414.00 კვ.მ. მიწის ფართობი გადასცა. გარდა ამისა, 28 შემთხვევაში უძრავი ქონება პირდაპირი განკარგვის ფორმით სიმბოლურ ფასად - 1 ლარად.
„ეს თემები არის აჟიტირებული ხელოვნურად, რადგანაც ვიღაცის ინტერესში არის, რომ ეკლესიას არ გადაეცეს არანარი ქონება.
ჩვენ,სახელმწიფოსთან ერთად განვიხილავთ მიზანშეწონილობას ამა თუ იმ ქონების გადმოცემის თაობაზე.
ახლაც ვიმყოფებოდი სახელმწიფო კანცელარიაში. რატომ მივიღებდით ასეთ გადაწყვეტილებას? მე მაქვს ერთი ხმა და იქ კომისიის 10 კაციანი შემადგენლობაა. ჩვენ ასეთ გადაწყვეტილებას კონსენსუსით ვიღებთ. დასაბუთებული მასალები მოდის სახელმწიფო კანცელარიაში იმასთან დაკავშირებით, თუ რისთვის სჭირდება ეკლესიას ეს თუ ის მიწის ნაკვეთი.
ფაქტიურად ჩვენ მიწის ნაკვეთებს არ ვითხოვთ, თუ მასზე ეკლესიის მშენებლობა არ არის გამიზნული. პრაქტიკულად ასეთ მიწის ნაკვეთებს არ ვითხოვთ.
რაც შეეხება ამორტიზირებულ შენობებს და სხვა ქონებას, რომელსაც სახელმწიფო აძლევს ეკლესიას - ეს სჭირდება ეკლესიას ინფრასტრუქტურისათვის. ეს გათვალისწინებულია იმ ნორმებით, რა ნორმებიც არსებობს სახელმწიფოსა და ეკლესიას შორის. ეს სახელმწიფო არის სამართალმემკვიდრე იმ სახელმწიფოსი, რომლის დროსაც, ჩვენ დავკარგეთ უზარმაზარი და განუსაზღვრელი რაოდენობის ქონება. ამიტომ, ნურავის ნუ უკვირს როდესაც სახელმწიფოსაგან ეკლესია იღებს ქონებას.
ასეთივე ქონებას იღებენ სხვა რელიგიური დენომინაციები საქართველოში. რატომ მათზე არ გიჩნდებათ ასეთი კითხვები? მარტო საქართველოს მართლმადიდებელ ეკლესიას ეძლევა ქონება? სხვა ეკლესიებსაც ხომ არ აძლევენ, ამაზეც ვისაუბროთ“,-განუცხადა ბოტკოველმა ჟურნალისტებს მთავრობის კანცელარიაში.
მონიკა დავლიანიძე