მოზაიკა

დღეს მოვისმინეთ პირდაპირი ტყუილი საქართველოს პრეზიდენტის მხრიდან - ირაკლი კობახიძე

საქართველოს პარლამენტის თავმჯდომარემ, ირაკლი კობახიძემ ქვეყნის პირველი პირი ტყუილში დაადანაშაულა. საქმე ეხება ანა დოლიძის განცხადებას, რომლის თანახმად, პრეზიდენტს არ მიუღია ვენეციის კომისიის წინასწარი დასკვნა.

კობახიძემ ფიქრია ჩიხრაძის პრესკონფერენცია გაიხსენა, სადაც პრეზიდენტის ადმინისტრაციის წარმომადგენელმა დაადასტურა, რომ ვენეციის კომისიის დასკვნას გაეცნო.

„გვქონდა ინფორმაცია იმის თაობაზე, რომ გაეგზავნა საქართველოს პრეზიდენტს შესაბამისი დოკუმენტი ვენეციის კომისიის მხრიდან და ამასთან დაკავშირებით გვაქვს დამადასტურებელი შესაბამისი დოკუმენტი. გარდა ამისა, როდესაც ფიქრია ჩიხრაძემ დაიწყო თავისი პრესკონფერენცია კონსტიტუციასთან დაკავშირებით, მისი პირველი სიტყვა იყო, გავეცანით ვენეციის კომისიის პირველად დოკუმენტს. ეს თვითონ მან ბრძანა და დაადასტურა, რომ ჰქონდა დოკუმენტი მიღებული, გაეცნო ამ დოკუმენტს და ამის საფუძველზე ჩაატარა ბრიფინგი. ჩვენ დღეს მოვისმინეთ პირდაპირი ტყუილი. ამაში ქალბატონ ანას ვერ დავადანაშაულებ, როცა საუბრობს საპარლამენტო მდივანი, საუბრობს არა ქალბატონი ანა, არამედ პრეზიდენტი. ძალიან სამწუხაროა, რომ საქართველოს პრეზიდენტის მხრიდან ასეთ რამეებს ვისმენთ ხოლმე, ძალიან დამღლელია ყველაფერი, რაც ხდება საქართველოს პრეზიდენტის მხრიდან“, - განაცხადა კობახიძემ.

პარლამენტის თავმჯდომარის თქმით, პრეზიდენტს არ აქვს უფლება, ილაპარაკოს კონსესუსზე, რადგან 4 თვის განმავლობაში საკონსტიტუციო კომისიის არცერთ სხდომას არ დასწრებია.

შეგახსენებთ, საქართველოს პარლამენტის თავმჯდომარის, ირაკლი კობახიძის განცხადებით, ვენეციის კომისიის წინასწარი დასკვნა პარლამენტის ხელმძღვანელობამ და საქართველოს პრეზიდენტმა მიიღეს, რაც უარყო პრეზიდენტის საპარლამენტო მდივანმა, ანა დოლიძემ.

კობახიძემ ასევე აღნიშნა, რომ კომისიის მოთხოვნა იყო, დოკუმენტი არ გასაჯაროვებულიყო, თუმცა გუშინ დასკვნა მედიაში გავრცელდა.

ანა მებურიშვილი