მოზაიკა

თბილისში „ბარსელონას“ ლეგენდებისა და ქართველი ვეტერანების მატჩი გაიმართა

თბილისმა საქართველოს ნაკრებისა და „ბარსელონას“ ლეგენდების მატჩს უმასპინძლა. შეხვედრა ბორის პაიჭაძის სახელობის „დინამო არენაზე“ გაიმართა. ლეგენდების მატჩის ორგანიზატორი იყო კომპანია „Sports Orient”, გენერალური სპონსორი კი -- “Betsson”.

მატჩი ორმხრივი შეტევებით დაიწყო. ანგარიში 25-ე წუთზე საქართველოს ნაკრებმა გახსნა. გოლი გიორგი ნავალოვსკიმ გაიტანა. 34-ე წუთზე ანგარიში ხავიერ სავიოლამ გაათანაბრა.

მეორე ტაიმში “ბარსელონა” ჯონათან სორიანომ დააწინაურა, რომელმაც გოლი 54-ე წუთზე გაიტანა. 72-ე წუთზე კი ხავიერ სავიოლამ დუბლი შეასრულა და მატჩის საბოლოო ანგარიშიც 1:3 აღმოჩნდა.

აღსანიშნავია, რომ ლეგენდარულმა ბრაზილიელმა ვეტერანმა ფეხბურთელმა, რონალდინიომ მოედანი შეხვედრის დასრულებამდე 5 წუთით ადრე დატოვა. იგი მაყურებელმა მხურვალე ოვაციებით გააცილა.

რონალდინიოსთან ერთად, სტუმართა რიგებში ისეთმა სახელოვანმა ვეტერანებმა ითამაშეს, როგორებიც იარი ლიტმანენი, ედგარ დავიდსი, ხოსე ედმილსონი, ფილიპ კოკუ და სხვები არიან.

“ბარსელონას” ლეგენდებმა საქართველოს დედაქალაქში ჩემპიონთა ლიგის მთავარი სიმბოლო -- ჩემპიონთა ლიგის თასიც ჩამოიტანეს.

„დინამო არენაზე“ მისულ გულშემატკივრებს ფანზონაში თასის ხილვისა და მასთან სამახსოვრო ფოტოების გადაღების საშუალება მიეცათ.

აღნიშნული თამაში “ლეგენდების სერიის” მეორე მატჩი იყო, რომელიც 2024 წელს ბათუმში დაწყებული პროექტის გაგრძელებაა. შეგახსენებთ, რომ გასული წლის 7 მარტს ზღვისპირა ქალაქში ერთმანეთს მილანის “ინტერისა” და საქართველოს ვეტერანების ნაკრებები დაუპირისპირდნენ.