მოზაიკა

საქართველოს სახელოვანი იტალიელი მსახიობი სიმონა კავალარი ეწვევა

საქველმოქმედო ფონდ „ცხოვრება მშვენიერიას“ მოწვევით საქართველოს იტალიური კინოსა და თეატრის ცნობილი მსახიობი სიმონა კავალარი ესტუმრება. ლეგენდარული სერიალის -- „რვაფეხას“ -- ვარსკვლავი თბილისში 31 მაისს ჩამოვა და 1 კვირით დარჩება. ამ ხნის განმავლობაში ყვარელსა და თელავსაც ეწვევა. თელავში ის ადგილობრივ მსახიობებს შეხვდება, ქართულ კულინარიულ ტრადიციებს გაეცნობა და ლავაშის გამოცხობასაც შეეცდება. იგი ასევე დაესწრება იტალიის რესპუბლიკის ეროვნული დღესასწაულისადმი მიძღვნილ ღონისძიებას თბილისში, იტალიურ საღამოს რესტორან „ძველ მეტეხში“ და სხვა ღონისძიებებს.

როგორც „მედიანიუსს“ „ცხოვრება მშვენიერიას“ დამფუძნებელმა და გენერალურმა დირექტორმა ნიკა ესაკიამ განუცხადა, სიმონა კავალარი საქართველოს საქველმოქმედო მიზნით ესტუმრება. კერძოდ, იგი მარჯანიშვილის თეატრში 5 ივნისისთვის დაგეგმილი სპექტაკლის, „ოსკარი და ვარდისფერი ქალბატონის“, პრემიერას დაესწრება, რის შემდეგაც ქართული თეატრისა და კინოს მსახიობებს შეხვდება. სპექტაკლს ინკლუზიური დასი „ცხოვრება მშვენიერია“ წარმოადგენს. მისი რეჟისორია ნატალია გალოგრე. სპექტაკლი ასახავს სიმსივნით დაავადებული ბავშვების გამოწვევებს გამოჯანმრთელების გზაზე. ის ასევე ხაზს უსვამს იმას, თუ რა მნიშვნელობა აქვს თითოეულ დღეს ასეთი ბავშვებისათვის.

ღონისძიების მთავარი მიზანი სიმსივნესთან დაკავშირებული პრობლემისაკენ საზოგადოების ყურადღების მიპყრობაა. ფონდი „ცხოვრება მშვენიერიაც“ დაარსების დღიდან აღნიშნული პრობლემის გადაწყვეტაშია ჩართული და სიმსივნით დაავადებული ბავშვების დასახმარებლად საქართველოში უკვე არაერთი იტალიელი ვარსკვლავი ჰყავს მოწვეული.

შესაბამისი პროექტების განხორციელებაში ფონდს მხარს საქართველოში იტალიის საელჩო უჭერს.

სიმონა კავალარი 60-ზე მეტ ფილმშია გადაღებული, თუმცა ქართველმა მაყურებელმა ის განსაკუთრებით სერიალ „რვაფეხადან“ შეიყვარა.

„იტალიელებისაგან გამიგია, კავალარი იმდენად ნიჭიერია, ნიჭისამებრ დაფასებული არ არისო. იგი ისეთ სახელოვან მსახიობებთან თანამშრომლობდა, როგორებიც ვიტორიო გასმანი, სტეფანია სანდრელი, მიკელე პლაჩიდო და სხვები არიან. გარდა იტალიელებისა, გერმანელ და ფრანგ ვარსკვლავებთან ერთადაც უთამაშია. ესენი არიან: მარიო ადორფი, ბრუნო კრემერი და კლოდ რიში. ეს უკანასკნელი „რვაფეხაში“ მისი პერსონაჟის მამის როლს ასრულებს. სიმონა კავალარი იმ დროისათვის 17-18 წლისა იქნებოდა, რაც ბევრ რამეზე მეტყველებს. იგი ამჟამადაც აქტიური მსახიობია“, -- ამბობს ნიკა ესაკია და დასძენს, რომ კავალარიმ საქართველოში 7 დღით დარჩენის სურვილი თავად გამოთქვა.

ნიკა ესაკიას თქმითვე, სიმონა კავალარი ბავშვობაში მისთვის ქალის იდეალი იყო და საქართველოში მისი მოწვევა ამგვარ „პირად დამოკიდებულებასაც“ უკავშირდება.

თავად იტალიელი ვარსკვლავი საქართველოში დაგეგმილ პირველ მოგზაურობაზე ვიდეომიმართვას ავრცელებს და აცხადებს:

„დარწმუნებული ვარ, შევძლებთ ამ ორი ძალიან მდიდარი კულტურული მემკვიდრეობის მქონე ქვეყნის კიდევ უფრო დაახლოებას. გვინდა გავაკეთოთ იმედის გზავნილი ყველასთვის, ვინც სიმსივნეს ებრძვის. განსაკუთრებული მხარდაჭერა დაავადებულ ბავშვებს!“

შეგახსენებთ, რომ საქველმოქმედო ფონდი „ცხოვრება მშვენიერია“ 2014 წელს დაფუძნდა და დღემდე არაერთ ადამიანს დაეხმარა.