ეკონომიკა

ძველი თბილისის რეაბილიტაცია სპეციფიური მიმართულებაა და ამ პროცესში ყველა სამშენებლო კომპანია ვერ მიიღებს მონაწილეობას - ირაკლი ზარქუა

გუდიაშვილის მოედნის სარეაბილიტაციო სამუშაოებისთვის კომპანიის შესარჩევად თბილისის მუნიციპალური განვითარების ფონდმა ტენდერი ფაქტობრივად ჩაატარა, - განუცხადა ჟურნალისტებს თბილისის საკრებულოში საფინანსო-საბიუჯეტო კომისიის თავმჯდომარემ ირაკლი ზარქუამ, რომელიც გამოეხმაურა ფრაქცია „ნაციონალური მოძრაობის“ წევრ ლევან ხაბეიშვილის მიერ გავრცელებულ ინფორმაციას.

ირაკლი ზარქუას განმარტებით, ძველი თბილისის რეაბილიტაცია სპეციფიური მიმართულებაა და ამ პროცესში ყველა სამშენებლო კომპანია ვერ მიიღებს მონაწილეობას.

მისივე თქმით, თბილისის მუნიციპალური განვითარების ფონდმა, რომელიც ძველი თბილისის სარეაბილიტაციო პროექტებს ახორციელებს, ფაქტობრივად ტენდერი ჩაატარა, რომელშიც დაახლოებით 4 კომპანია მონაწილეობდა. მისი თქმით, მათ წარმოადგინეს სამუშაოებისთვის საკუთარი ხარჯთაღრიცხვა, მოხდა ფასების ექსპერტიზა, შესაბამისობის დადგენა და ამის შემდეგ მოხდება კომპანიის შერჩევა.

ამასთან, ზარქუამ არ დაასახელა, თუ რომელი კომპანიები მონაწილეობდნენ და რომელი მათგანი იქნა მიჩნეული საუკეთესოდ.

ცნობისათვის, თბილისის საკრებულოს ფრაქცია „ნაციონალური მოძრაობის“ წევრი ლევან ხაბეიშვილი პრემიერ-მინისტრ გიორგი კვირიკაშვილს მოუწოდებს, ხელი არ მოაწეროს დედაქალაქის მერიის განკარგულების პროექტს, რომლითაც გუდიაშვილის მოედნის რეაბილიტაცია ერთ პირთან მოლაპარაკების გზით უნდა განხორციელდეს. როგორც ხაბეიშვილმა განმარტა, საუბარია 50 მილიონ ლარზე, რომლის განკარგვას დედაქალაქის მერია ტენდერის გარეშე ითხოვს ერთ პირთან მოლაპარაკების გზით.

ნინო ექვთიმიშვილი