პოლიტიკა
იუსტიციის უმაღლესმა საბჭომ 34 მოსამართლე უვადოდ დანიშნა
იუსტიციის უმაღლესმა საბჭომ 38 კანდიდატიდან 34 მოსამართლე უვადოდ გაამწესა. მათ შორის არიან თბილისის სააპელაციო სასამართლოს მოსამართლე თამარ ალანია, რომელიც განიხილავდა საქმეს გვანცა ყუფარაძის წინააღმდეგ. საბჭომ ასევე მხარი დაუჭირა ქუთაისის სააპელაციო სასამართლოს თავმჯდომარე დიმიტრი გვრიტიშვილს, ბათუმის საქალაქო სასამართლოს თავმჯდომარე დავით მამისეიშვილს, სამტრედიის რაიონული სასამართლოს თავმჯდომარე ლევან მეშველიანს, თბილისის საქალაქო სასამართლოს თავმჯდომარე ვასილ მშვენიერაძეს, რუსთავის საქალაქო სასამართლოს თავმჯდომარე მამია ფხაკაძესა და სხვებს.
უვადოდ დანიშვნაზე უარი უთხრეს 4 მოსამართლეს: ირაკლი აბშილავას ზუგდიდის რაიონული სასამართლოდან, ეკატერინა გაბრიჩიძეს თბილისის საქალაქო სასამართლოდან, ელისო ტუკვაძეს თბილისის საქალაქო სასამართლოდან და ცაგერის რაიონული სასამართლოს თავმჯდომარის მოვალეობის შემსრულებელ როინ კახიძეს.
კენჭისყრაში მონაწილეობა არ მიუღია იუსტიციის უმაღლესი საბჭოს თავმჯდომარე ნინო გვენეტაძეს. მისი თქმით, მას ბევრ კითხვაზე პასუხი არ აქვს და თავის თავზე აღებული პასუხისმგებლობის გამო არჩევანს ვერ გააკეთებს. ასევე უვადო მოსამართლეთა არჩევაში არ მონაწილეობდნენ საბჭოს არამოსამართლე წევრები ნაზი ჯანეზაშვილი და ვახტანგ მჭედლიშვილი, ხოლო ლევან თევზაძე სხდომას არ ესწრებოდა, რადგან შვებულებაში იმყოფება.