საზოგადოება

მიწა არის დღეს ჩვენი ღმერთი! - როსტომ ჩხეიძე

ილია ილია არ იქნებოდა, ქართული მიწები რომ არ გადაერჩინა გაყიდვისაგან. ეს არის მისი უპირველესი ღვაწლი, ყველა მისი დამსახურების გვირგვინი. - წერს მწერალი როსტომ ჩხეიძე სოციალურ ქსელში.

„მიწა არის დღეს ჩვენი ღმერთი , - აცხადებდა ილია და კიდეც შესაფერისად უპატრონებდა.

მიწა არის დღეს ჩვენი ღმერთი, - აცხადებდა ოთარ ჩხეიძე, ოლიას გზის უშუალო გამგრძელებელი მეოცე საუკუნეში და გვიბეჯითებდა ამ ვალისა და ანდერძის აღსრულებას.

მიწა არის დღეს ჩვენი ღმერთი, - კვლავაც ასე უნდა გვწამდეს და ვიმეორებდეთ, ვიმეორებდეთ და კვლავაც შესაფერისად ვპატრონობდეთ ჩვენს მიწას, რომელსაც მარტო რუსეთის იმპერია კი არ გვტაცებს მავთულხლართებით, ეს მავთულხლართები გავლებული აქვთ ჩვენს ხელისუფალთაც, მიწების გაყიდვას უცხოელებზე, ამ უპატიებელ ცოდვა-დანაშაულს სასიკეთოდაც რომ აცხადებენ ქვეყნისათვის, მარიხუანას დათესვისა არ იყოს.

და თუ ეს დავთმეთ, რაღა კაცნი ვიქნებით, რა პასუხს გავცემთ ჰაერში გამოკიდებულ (რეალურადაც და სიმბოლურადაც) ჩვენს შთამომავლობას. მიწა არის დღეს ჩვენი ღმერთი და მიწის გაყიდვით ღმერთსა ვყიდით - უკვე მერამდენედ!..

მიწა, მიწა, მიწა არის ღმერთი, ჩვენი ღმერთი!“ - დაწერა როსტომ ჩხეიძემ.