მოზაიკა

მშვიდობით, ჩემო ნაკრებო და გულშემატკივარო, კაპიტნის წასვლის დროც მოვიდა! - ზაზა ფაჩულიამ სანაკრებო კარიერა დაასრულა

საქართველოს საკალათბურთო ნაკრების კაპიტანმა ზაზა ფაჩულიამ ეროვნულ გუნდში კარიერა დაასრულა. სპორტსმენმა ფეისბუკის საკუთარ გვერდზე მიმართვა გაავრცელა, სადაც გულშემატკივრებს მხარდაჭერისთვის მადლობა გადაუხადა.

„ძალიან რთულია, დატოვო ის, რაც მრავალი წელი შენს ბიჭებთან ერთად მხრებით მოიტანე. B დივიზიონიდან ევროპამდე არ იყო მარტივი გზა, დამეთახმებით. 17 წლის განმავლობაში იყო მრავალი წარმატება, წარუმატებლობაც, ყოველთვის უკეთესის მოლოდინი, მაგრამ ეს არის ის, რაც ჩვენ გამოგვივიდა და დანარჩენს დიდი იმედი მაქვს, მომავალი თაობები გააგრძელებენ. ძალიან მინდოდა სხვანაირი დასასრული, მაგრამ სამწუხაროდ, ტრავმამ მეტის საშუალება არ მომცა, მაგრამ სურვილი და გამარჯვების ჟინი არასდროს დამიშურებია. ყველაზე ძალიან გული მწყდება გულშემატკივარზე, რომლის თანადგომას ეს ნაკრები ყოველთვის გრძნობდა და პირადად მე, ჩემი კარიერის განმავლობაში. მინდა ძალიან დიდი მადლობა გადაგიხადოთ თითოეულ თქვენგანს, თქვენ უფრო დიდ სიხარულს იმსახურებდით და კვლავ მომავლის იმედით. ახლა კი მშვიდობით, ჩემო ნაკრებო და გულშემატკივარო, კაპიტნის წასვლის დროც მოვიდა! ეს ოქროს წლები არასდროს დამავიწყდება.

მადლობა“, - წერია ფაჩულიას მიმართვაში.

შეგახსენებთ, საქართველოს ნაკრები 2017 წლის ევრობასკეტს გამოეთიშა. ბოლო შეხვედრაში ქართველი კალათბურთელები იტალიის ნაკრებთან მინიმალური სხვაობით, 69:71 დამარცხდნენ.

ანა მებურიშვილი