პოლიტიკა

ნაციონალურ მოძრაობას პარლამენტის 21 წევრი დატოვებს - ირმა ნადირაშვილი

ნაციონალური მოძრაობის, ე.წ ბოკერია-ბაქრაძის ჯგუფის წარმომადგენლის ირმა ნადირაშვილის განცხადებით, ნაციონალური მოძრაობას პარლამენტის 21 წევრი დატოვებს.

როგორც ნადირაშვილმა თემაზე საუბრისას მედიას განუცხადა, ე.წ ბოკერია-ბაქრაძის გუნდს ბევრი რეგიონული თავმჯდომარე, მათ შორის თბილისის ცხრა თავმჯდომარე შეუერთდება.

„პარლამენტის 21 წევრი დატოვებს პარტიას. პარტიას ტოვებს პოლიტსაბჭოს თავმჯდომარეც. ძალიან ბევრი რეგიონული თავმჯდომარეც სწორედ ჩვენს გუნდში იქნება, მათ შორის თბილისის 14 თავმჯდომარიდან ცხრა, ამ გაყოფის პროცესში დაიჭერს ჩვენ მხარეს“,-აღნიშნა ნადირაშვილმა.

რაც შეეხება ინფორმაციას იმის შესახებ, რომ რამდენიმე დღეში ვანო მერაბიშვილი სასჯელაღსრულების დაწესებულებიდან წერილს გამოაქვეყნებს, საიდანაც გაირკვევა თუ ვის გუნდში დარჩება იგი, ირმა ნადირაშვილი ამბობს, რომ მისთვის უცნობია, თუ რა გადაწყვეტილებას მიიღებს ვანო მერაბიშვილი, თუმცა მიანიშნებს, რომ ის სწორედ მათ გუნდში გადავა.

„არ ვიცი ვანო მერაბიშვილი რა გადაწყვეტილებას მიიღებს, მაგრამ მე ვიცი, ის ადამიანები, ვისაც განსაკუთრებული ახლობლობა აქვთ ვანო მერაბიშივლთან, პირდაპირ შემიძლია მოვიყვანო სამცხე ჯავახეთის მაგალითი, ამ რეგიონმა არც ერთი დელეგატი არ გააგზავნა ყრილობაზე“,-აღნიშნა ირმა ნადირაშვილმა.

დღეს ნაციონალური მოძრაობის ე.წ ბოკერია-ბაქრაძის გუნდის წარმომადგენლები, 15:00-ზე ბრიფინგს გამართავენ.

მოგვიანებით კი, ბრიფინგის გამართვას მიხეილ სააკაშვილის გუნდის წევრებიც გეგმავენ.

მონიკა დავლიანიძე